பலமுறை வெளியேற்றப்பட்ட பாஜக எம்எல்ஏ விஜேந்தா் குப்தா தில்லி பேரவைத் தலைவராக வாய்ப்பு!

ஆம் ஆத்மி கட்சியின் கடந்த 10 ஆண்டு ஆட்சியின்போது, தில்லி பேரவையிலிருந்து பலமுறை வெளியேற்றப்பட்ட முன்னாள் எதிா்க்கட்சித் தலைவா் விஜேந்தா் குப்தா (61), தற்போது அவா் தில்லி சட்டப்பேவரையின் புதிய தலைவராக இருப்பாா் என்று கட்சித் தலைவா்கள் தெரிவித்தனா்.

கடந்த 10 ஆண்டுகளாக ரோஹிணி எம்எல்ஏவாகப் பொறுப்பு வகித்து வந்த விஜேந்தா் குப்தா, தனது தொகுதியின் பிரச்னைகள் மற்றும் எதிா்ப்புகளை பதிவு செய்து வந்தாா். 2015-இல் நடந்த பேரவைக் கூட்டத்தொடரின்போது, அப்போதைய பேரவைத் தலைவரால் பலமுறை வெளியேற்றப்பட்டாா். 2016 அக்டோபா் மாதம் நடைபெற்ற பேரவைக் கூட்டத்தொடரின்போது, மேசையின் மீது நின்றாா் தனது கண்டனத்தைத் தெரிவித்தாா்.

இந்த ஆண்டு நடந்து முடிந்த பேரவைத் தோ்தலில் ரோஹிணி தொகுதியில் போட்டியிட்டு மூன்றாவது முறையாக எம்எல்ஏவானாா். இந்த நிலையில் விஜேந்தா் குப்தா, தில்லி பேரவைத் தலைவராக பாஜகவால் அறிவிக்கப்பட்டுள்ளாா்.

இது குறித்து அவா் செய்தியாளா்களிடம் வியாழக்கிழமை கூறியதாவது:

தில்லி பேரவைத் தலைவா் பொறுப்பை எனக்கு வழங்கியதற்காக கட்சிக்கு நான் மிகவும் நன்றி கூறுகிறேன். இந்தப் பொறுப்பை நான் திறம்பட நிறைவேற்றுவேன். கடந்த ஆண்டில் விதிகள் மற்றும் விதிமுறைகளை மீறி அராஜக முறையில் சட்டப்பேரவையை நடத்தியவா்களிடையே நல்ல உணா்வுகள் மேலோங்க கடவுளிடம் பிராா்த்தனை செய்கிறேன். எதிா்க்கட்சியான ஆம் ஆத்மி பேரவையில் ஆரோக்கியமான விவாதத்தின் ஒரு பகுதியாக மாறும் என்று எதிா்பாா்க்கிறேன் என்று அவா் தெரிவித்தாா்.

புதிதாக அமைக்கப்பட்ட 8-ஆவது தில்லி சட்டப்பேவரையில் பாஜகவுக்கு 48 எம்எல்ஏக்கள் உள்ளனா். எதிா்க்கட்சியான ஆம் ஆத்மி கட்சிக்கு 22 எம்எல்ஏக்கள் உள்ளனா். சட்டப்பேரவைத் தலைவா் உறுப்பினா்களால் தோ்ந்தெடுக்கப்படுகிறாா்.

சட்டப்பேரவையில் பாஜக பெரும்பான்மையைக் கருத்தில் கொண்டு, பேரவைத் தலைவா் பதவிக்கு குப்தா உயா்த்தப்படுவது முன்கூட்டியே தீா்மானிக்கப்பட்ட முடிவு.

2015-2020 வரை ஆளும் ஆம் ஆத்மி எம்எல்ஏக்கள் 67 போ் ஆதிக்கம் செலுத்திய பேரவையில் 3 பாஜக எம்எல்ஏக்களில் ஒருவரான குப்தா, எதிா்க்கட்சித் தலைவா் பதவியை வகித்தாா். மற்ற இரண்டு பாஜக எம்எல்ஏக்களுடன் சோ்ந்து, பேரவைக் கூட்டத்தொடரின்போது பேரவைத் தலைவா் மற்றும் ஆம் ஆத்மி எம்எல்ஏக்களுடன் அவா் மோதினாா்.

பொதுப் பிரச்னைகள் தொடா்பாகவும், ஆளும் கட்சி எம்எல்ஏக்கள் பாஜக மற்றும் அதன் தேசியத் தலைவா்கள் மீது தாக்குதல் நடத்துவதை எதிா்த்ததற்காகவும், ஒவ்வொரு கூட்டத்தொடரிலும் அவா் தனது 2 பேரவை உறுப்பினா்களுடன் வெளியேற்றப்பட்டாா்.

ஜூன் 2015-இல், 4-ஆவது தில்லி நிதி ஆணைய அறிக்கையை முன்வைக்க வலியுறுத்தியதால், பேரவைத் தலைவா் உத்தரவின்பேரில், அவா் பேரவைக் காவலா்களால் தூக்கிச் செல்லப்பட்டு வெளியேற்றப்பட்டாா்.

2020 சட்டப்பேரவைத் தோ்தலில், ஆம் ஆத்மி 62 இடங்களுடன் மீண்டும் ஆட்சிக்கு வந்தது. அதே நேரத்தில் பாஜக வெறும் 8 பேரவை உறுப்பினா்களை மட்டுமே கொண்டிருந்தது. ஆம் ஆத்மி ஆதிக்கம் செலுத்தும் அவையில் எதிா்க்கட்சியான பாஜகவின் எம்எல்ஏவாக குப்தா தனது போராட்டங்களை மீண்டும் தொடா்ந்தாா். 2024 ஆகஸ்ட் மாதம் எதிா்க்கட்சித் தலைவராக பொறுப்பேற்ற பிறகு அது மேலும் தீவிரமடைந்தது.

2024 நவம்பா் மாதம் தில்லியில் சட்டம் ஒழுங்கு நிலைமை தொடா்பாக ஆளும் கட்சி பேரவை உறுப்பினா்களுடன் வாா்த்தைப் போரில் ஈடுபட்டபோது, குப்தா மற்ற பாஜக உறுப்பினா்களுடன் குண்டுக்கட்டாக வெளியேற்றப்பட்டாா்.

நிகழாண்டு ரோகிணி தொகுதியில் போட்டியிட்ட குப்தா, தன்னை எதிா்த்து போட்டியிட்ட ஆம் ஆத்மி வேட்பாளரை 38,000 வாக்குகள் வித்தியாசத்தில் தோற்கடித்தாா்.

குப்தா, 1997-இல் மாநகராட்சி கவுன்சிலராக தனது தோ்தல் பயணத்தைத் தொடங்கினாா்.

2013-இல், அவா் தனது முதல் சட்டப்பேரவை தோ்தலில் புது தில்லி தொகுதியில் போட்டியிட்டு, தோல்வியடைந்தாா். அப்போதைய தில்லி முதல்வா் ஷீலா தீட்சித் மற்றும் ஆம் ஆத்மி தேசிய அமைப்பாளா் அரவிந்த் கேஜரிவாலுக்கு எதிராகப் போட்டியிட்டு வெற்றி பெற்றாா்.

2015 பேரவைத் தோ்தல்களில் ரோகிணி தொகுதியில் இருந்து வெற்றி பெற்ற அவா், 2020 மற்றும் 2025 தோ்தல்களிலும் அதைத் தக்கவைத்துக் கொண்டாா்.