பள்ளிகளில் மாணவா்களுக்கு மருந்து விநியோகிக்க தடை விதிக்க வலியுறுத்தல்

முறையான மருத்துவப் பரிசோதனையில்லாமல், பள்ளி, கல்லூரிகளில் மாணவா்களுக்கு மருந்து மாத்திரைகள் விநியோகிப்பதை தடை செய்ய வேண்டும் என வலியுறுத்திப்பட்டது.

இதுதொடா்பாக இயற்கை வழி வாழ்வியலாளா்கள் கூட்டமைப்பின் திண்டுக்கல் மாவட்ட ஒருங்கிணைப்பாளா் பா.ராஜகுரு தலைமையில் பெண்கள் சிலா், மாவட்ட ஆட்சியா் அலுவலகத்துக்கு திங்கள்கிழமை மனு அளிக்க வந்தனா். அப்போது அவா்கள் கூறியதாவது, தமிழ்நாட்டில் சித்தா, ஹோமியோபதி, ஆயுா்வேதம், யுனானி, இயற்கை மருந்துவம், மரபு வாழ்வியல் என பல்வேறு மருத்துவ முறைகள் பின்பற்றப்படுகின்றன.

இந்த சூழலில், பள்ளி மாணவா்களிடம் ஒற்றை மருத்துவ முறையை (அலோபதி) நூதான முறையில் திணிப்பதை அரசு உடனடியாக கைவிட வேண்டும்.

பள்ளிகளில் மதத் திணிப்புக்கு எதிராக குரல் எழுப்பும் அமைப்புகள், உயிருக்கு ஆபத்தை ஏற்படுத்தக் கூடிய, பக்க விளைவுகளை ஏற்படுத்தக் கூடிய அலோபதி ஒற்றை மருத்துவ முறை குறித்து கண்டுகொள்வதில்லை.

பள்ளி, கல்லூரிகளில் ஆசிரியா்கள் முன்னிலையில் தடுப்பூசி, மருந்து மாத்திரைகள் மாணவா்களுக்கு கொடுக்கப்படுகிறது. மாணவா்களை முறையாக பரிசோதிக்காமல் , மாத்திரைகளை நூதன முறையில் திணிப்பதையும், இலவசமாக நஞ்சுள்ள பஞ்சுகளை கொடுப்பதையும் தமிழக அரசு அனைத்து கல்வி வளாகங்களிலும் தடை செய்ய வேண்டும் என வலியுறுத்தினா்.