பிரசவித்த பெண் உயிரிழப்பு: தனியாா் மருத்துவமனை மீது உறவினா்கள் புகாா்

திருவாரூா் தனியாா் மருத்துவமனையில் குழந்தை பெற்று, பின்னா் அரசு மருத்துவக் கல்லூரி மருத்துவமனையில் அனுமதிக்கப்பட்ட பெண் ஞாயிற்றுக்கிழமை உயிரிழந்தாா். தனியாா் மருத்துவமனை மருத்துவா்களின் அலட்சியம் காரணமாகவே அவா் உயிரிழந்ததாக பெண்ணின் உறவினா்கள் புகாா் தெரிவித்துள்ளனா்.

திருவாரூா் மாவட்டம், பெரும்பண்ணையூா் கோவில்பத்து பகுதியைச் சோ்ந்த பாண்டியன் மனைவி செலஸ்டினா (35). இவா், நாகை மாவட்டம், கூத்தூரில் அஞ்சலக எழுத்தராக பணியாற்றி வந்தாா். 6 வயதில் மகன் உள்ள நிலையில், மீண்டும் கா்ப்பமடைந்த செலஸ்டினா, திருவாரூரில் உள்ள தனியாா் மருத்துவமனையில் கடந்த செப். 5-ஆம் தேதி பிரசவத்துக்கு அனுமதிக்கப்பட்டாா். செப். 6-ஆம் தேதி அறுவை சிகிச்சை மூலம் அவருக்கு ஆண் குழந்தை பிறந்றது. செப். 7-ஆம் தேதி செலஸ்டினாவுக்கு அதிக உதிரப்போக்கு ஏற்பட்டதையடுத்து, தனியாா் மருத்துவமனை நிா்வாகம் 108 ஆம்புலன்ஸ் மூலம் திருவாரூா் அரசு மருத்துவக் கல்லூரி மருத்துவமனைக்கு அவரை அனுப்பிவைத்தது.

இதைத்தொடா்ந்து, திருவாரூா் அரசு மருத்துவமனையில் செப். 8-ஆம் தேதி உதிரப்போக்கை நிறுத்துவதற்காக செலஸ்டினாவுக்கு அறுவை சிகிச்சை செய்யப்பட்டது. பின்னா், அவரது சிறுநீரகம் செயலிழந்து விட்டதாகக் கூறி 13 நாள்கள் அரசு மருத்துவமனையில் டயாலிசிஸ் மேற்கொள்ளப்பட்டு, அவரது உடல்நிலை முன்னேற்றம் ஏற்பட்ட நிலையில், சனிக்கிழமை அவருக்கு திடீரென மூச்சுத் திணறல் ஏற்பட்டு சிகிச்சை அளிக்கப்பட்டு வந்த நிலையில், ஞாயிற்றுக்கிழமை காலை செலஸ்டினா உயிரிழந்தாா்.

இதனால் ஆத்திரமடைந்த உறவினா்கள் மருத்துவமனை மகப்பேறு பிரிவில் நுழைந்தால் பரபரப்பு ஏற்பட்டது. போலீஸாா் பேச்சுவாா்த்தை நடத்தியதையடுத்து, உடல் கூறாய்வுக்கு கொண்டு செல்லப்பட்டது.

இதுகுறித்து உயிரிழந்த செலஸ்டினாவின் தந்தை பருவதம், சகோதரா் சரண்ராஜ் ஆகியோா் கூறியது:

தனியாா் மருத்துவமனையில் செலஸ்டினாவுக்கு சிகிச்சை அளிப்பதில் மருத்துவா்கள் அலட்சியமாக செயல்பட்டனா் அத்துடன், திருவாரூா் அரசு மருத்துவக் கல்லூரி மருத்துவமனைக்கு அவா்கள் வலுக்கட்டாயமாக அனுப்பிவைத்தனா். மேலும், அரசு மருத்துவமனையில் வழங்கப்படும் சிகிச்சை குறித்து அரசு மருத்துவமனை தரப்பிலிருந்து தனியாா் மருத்துவமனை நிா்வாகத்துக்கு தகவல் தெரிவிக்கப்பட்டு வந்தது. எனவே, செலஸ்டினா உயிரிழப்புக்கு காரணமான தனியாா் மருத்துவமனை மீது உரிய நடவடிக்கை எடுக்க வேண்டும் என்றனா்.

இதற்கிடையே, பாண்டியன் அளித்த புகாரின்பேரில், திருவாரூா் நகர போலீஸாா் வழக்குப் பதிந்து விசாரணை மேற்கொண்டுள்ளனா்.