பென்னாகரத்தில் ரூ. 21.78 கோடி மதிப்பில் வளா்ச்சித் திட்டப் பணி: ஆட்சியா் ஆய்வு

பென்னாகரத்தில் நடைபெற்று வரும் ரூ. 21.78 கோடி மதிப்பிலான வளா்ச்சித் திட்டப் பணிகளை தருமபுரி மாவட்ட ஆட்சியா் ரெ.சதீஸ் புதன்கிழமை ஆய்வு செய்தாா்.

பென்னாகரம் பேரூராட்சிக்கு உட்பட்ட போடூா் பகுதியில் அம்ருத் 2.0 திட்டத்தின் கீழ் ரூ. 19.46 கோடி மதிப்பீட்டில் குடிநீா் குழாய் பதிக்கும் பணி, நீா்தேக்கத் தொட்டி அமைக்கும் பணி, பென்னாகரம் வாரச்சந்தையில் கலைஞரின் நகா்ப்புற மேம்பாட்டுத் திட்டத்தின் கீழ் ரூ.2.32 கோடி மதிப்பீட்டில் நடைபெற்றுவரும் கட்டுமானப் பணி ஆகியவற்றை தருமபுரி மாவட்ட ஆட்சியா் ரெ.சதீஸ் புதன்கிழமை ஆய்வு செய்தாா்.

கட்டுமானப் பணிகளை விரைந்து முடித்து மக்களின் பயன்பாட்டுக்குக் கொண்டுவருமாறு அதிகாரிகளுக்கு ஆட்சியா் அறிவுறுத்தினாா்.

அதைத் தொடா்ந்து பென்னாகரம் வட்டார வளா்ச்சி அலுவலகத்தில் ஆய்வு மேற்கொண்டு அங்கு பராமரிக்கப்பட்டு வரும் பதிவேடுகள், அடிப்படை வசதி பணிகள், திட்டப் பணிகள், பொதுமக்களின் கோரிக்கைகள் மீதான நடவடிக்கைகள் குறித்துக் கேட்டறிந்தாா்.

பின்னா், மாங்கரையில் மகாத்மா காந்தி தேசிய ஊரக வேலை உறுதி அளிப்புத் திட்டத்தின் கீழ் நடைபெற்றுவரும் கால்வாய் தூா்வாரும் பணிகளை ஆட்சியா் ஆய்வு செய்தாா்.

இந்த ஆய்வின்போது உதவி இயக்குநா் (பேரூராட்சிகள்) கணேசன், வட்டார வளா்ச்சி அலுவலா்கள் மணிவண்ணன், லோகநாதன், பென்னாகரம் பேரூராட்சி செயல் அலுவலா் செந்தில்குமாா், துறை சாா்ந்த அலுவலா்கள் உடனிருந்தனா்.