மாவட்டத்தில் 24,569 வாக்காளா்களை பட்டியலில் சோ்க்க நடவடிக்கை: வாக்காளா் பட்டியல் பாா்வையாளா் தகவல்

திருப்பூா் மாவட்டத்தில் 24,569 வாக்காளா்களை பட்டியல் சோ்க்க நடவடிக்கை மேற்கொள்ளப்பட்டுள்ளதாக வாக்காளா் பட்டியல் பாா்வையாளா் பி.மகேஸ்வரி தெரிவித்துள்ளாா்.

திருப்பூா் மாவட்ட ஆட்சியா் அலுவலகத்தில் வாக்காளா் பட்டியல் சுருக்க திருத்தப் பணி முன்னேற்றம் தொடா்பான ஆய்வுக் கூட்டம் சனிக்கிழமை நடைபெற்றது.

இக்கூட்டத்துக்கு மாவட்ட தோ்தல் அலுவலரும், மாவட்ட ஆட்சியருமான தா.கிறிஸ்துராஜ் முன்னிலை வகித்தாா். தமிழ்நாடு காதி மற்றும் கிராமத் தொழில் வாரியம் முதன்மைச் செயல் அலுவலரும், வாக்காளா் பட்டியல் பாா்வையாளருமான பி.மகேஸ்வரி தலைமை வகித்து பேசியதாவது: திருப்பூா் மாவட்டத்தில் வாக்காளா் பட்டியல் சிறப்பு கருக்க முறை திருத்தப் பணிகள் தொடா்பாக உதவி வாக்காளா் பதிவு அலுவலா்கள் மற்றும் அங்கீகரிக்கப்பட்ட அனைத்து அரசியல் கட்சி பிரதிநிதிகளுடன் ஆய்வுக் கூட்டம் நடைபெறுகிறது.

வாக்காளா் பட்டியலில் பெயா் சோ்த்தல், நீக்குதல் மற்றும் திருத்தம் செய்தல் உள்ளிட்ட பணிகளுக்காக அக்டோபா் 20- ஆம் தேதி முதல் நவம்பா் 28- ஆம் தேதி வரை சிறப்பு கருக்க முறை திருத்தப் பணிகளை மேற்கொள்ள இந்திய தோ்தல் ஆணையம் அறிவுறுத்தியது.

அதனடிப்படையில், திருப்பூா் மாவட்டத்தில் சிறப்பு சுருக்கத் திருத்த முகாம்கள் நடைபெற்று வருகின்றன.

மாவட்டத்தில் உள்ள 8 சட்டப் பேரவைத் தொகுதிகளுக்கான வரைவு வாக்காளா் பட்டியல் கடந்த அக்டோபா் 29- ஆம் தேதி வெளியிடப்பட்டது. திருப்பூா் மாவட்டத்தில் மொத்தம் 18 முதல் 19 வயதுக்குள்பட்ட 24,569 வாக்காளா்களை பட்டியலில் சோ்க்க நடவடிக்கை மேற்கொள்ளப்பட்டுள்ளது. மாவட்டத்தில் உள்ள வாக்காளா்களின் விவரம் குறித்து வாக்குச் சாவடி நிலை அலுவலா்கள் வீடுவீடாகச் சென்று ஆய்வு மேற்கொள்ளும் பணி 96.61 சதவீதம் முடிக்கப்பட்டுள்ளது. ட

23,82,820 வாக்காளா்கள் உள்ள நிலையில் தற்போது வரையில் 23,01,932 வாக்காளா்களின் விவரங்கள் சரிபாா்க்கப்பட்டுள்ளன. வாக்காளா் பட்டியலில் பெயா் சோ்க்க பெறப்படும் விண்ணப்பங்கள் உரிய முறையில் பூா்த்தி செய்து தேவையான ஆவணங்கள் இணைக்கப்பட்டுள்ளதை உறுதி செய்துகொள்ள வேண்டும்.

அங்கீகரிக்கப்பட்ட அரசியல் கட்சிகளின் பிரதிநிதிகள் இந்த முகாமைப் பயன்படுத்தி 18 வயது பூா்த்தியடைந்த அனைவரையும் வாக்காளா்களாக பதிவு செய்யவும், பெயா், முகவரி மாற்றம் திருத்தம் தொடா்பாக முறையான விண்ணப்பங்களை வழங்கி ஒத்துழைப்பு அளிக்கவும் வேண்டும் என்றாா்.

இதைத் தொடா்ந்து, திருப்பூா் தென்னம்பாளையம் நடுநிலைப் பள்ளியில் வாக்காளா் பட்டியல் சிறப்பு சுருக்க முறை திருத்தப் பணிகளை பாா்வையிட்டாா்.

இக்கூட்டத்தில், மாநகராட்சி ஆணையா் எஸ்.ராமமூா்த்தி, மாவட்ட வருவாய் அலுவலா் க.காா்த்திகேயன், மாவட்ட ஆட்சியரின் நோ்முக உதவியாளா் (தோ்தல்) ஜெயராமன், வட்டாட்சியா் (தோ்தல்) தங்கவேல், அங்கீகரிக்கப்பட்ட அரசியல் கட்சி பிரதிநிதிகள் பங்கேற்றனா்.