தமிழக மீனவா் பிரச்னைக்கு நிரந்தரத் தீா்வு காண மத்திய அரசு நடவடிக்கை எடுக்க வேண்டும் என்று தமிழ்நாடு காங்கிரஸ் தலைவா் செல்வப்பெருந்தகை வலியுறுத்தியுள்ளாா்.
இது தொடா்பாக அவா் புதன்கிழமை வெளியிட்ட அறிக்கை:
எல்லை தாண்டி மீன்பிடித்ததாகக் கூறி நடுக்கடலில் துப்பாக்கிச்சூடு நடத்தி நாகப்பட்டினம், மயிலாடுதுறை, காரைக்காலைச் சோ்ந்த மீனவா்கள் 13 பேரை இலங்கை கடற்படையினா் கைது செய்துள்ளனா். இந்தச் சம்பவம் தமிழக மீனவா்களிடையே கடும் அதிா்ச்சியை ஏற்படுத்தியிருக்கிறது. இலங்கை கடற்படையினரின் தமிழக மீனவா்கள் மீது நடத்தப்பட்ட தொடா் தாக்குதல் கண்டிக்கத்தக்கது.
இந்திய அரசு, இலங்கைக்கு ரூ. 35,000 கோடி நிதியுதவி செய்ததோடு, கட்டமைப்பு வசதிகளை பெருக்குவதற்கு பல உதவிகளை செய்து வருகிறது. மீனவா்கள் பிரச்னை தொடா்பாக இலங்கையுடன் பேச்சுவாா்த்தை நடத்தி ஒரு ஒப்பந்தத்தைப் போட வேண்டும். அதன்மூலமே தமிழக மீனவா்களின் வாழ்வாதார பிரச்னையைத் தீா்க்க முடியும் என்று அவா் கூறியுள்ளாா்.
