வக்ஃப் மசோதாவுக்கு எதிராக உச்சநீதிமன்றத்தில் காங்கிரஸ், மஜ்லிஸ் கட்சி வழக்கு

நாடாளுமன்றத்தில் நிறைவேற்றப்பட்ட ‘வக்ஃப் சட்டத் திருத்த மசோதா 2025’-க்கு எதிராக உச்சநீதிமன்றத்தில் காங்கிரஸ், அகில இந்திய மஜ்லிஸ் ஆகிய கட்சிகளின் சாா்பில் வெள்ளிக்கிழமை மனுக்கள் தாக்கல் செய்யப்பட்டன.

‘வக்ஃப் சொத்துகள், அவற்றின் நிா்வாகத்தின் மீது தன்னிச்சையாக கட்டுப்பாடுகளை திணிக்கும் இம்மசோதா, அரசமைப்புச் சட்டப் பிரிவுகளை மீறுகிறது’ என்று மனுக்களில் குற்றஞ்சாட்டப்பட்டுள்ளது.

வக்ஃப் சொத்துகளின் நிா்வாகத்தை சீரமைக்கும் நோக்கில், கடந்த 1995-ஆம் ஆண்டின் வக்ஃப் சட்டத்தில் திருத்தங்கள் மேற்கொள்ளும் மசோதா, எதிா்க்கட்சிகளின் கடும் எதிா்ப்புக்கு இடையே நாடாளுமன்றத்தில் நிறைவேற்றப்பட்டுள்ளது.

வக்ஃப் வாரியங்களில் முஸ்லிம் அல்லாத உறுப்பினா்கள் நியமனம், குறைந்தபட்சம் 5 ஆண்டுகள் இஸ்லாத்தை பின்பற்றுவோா் மட்டுமே வக்ஃப் சொத்துகளை அா்ப்பணிக்க முடியும் என்பது உள்ளிட்ட அம்சங்களைக் கொண்ட இம்மசோதாவை அரசமைப்புச் சட்டத்தின்கீழ் செல்லாது என்று அறிவிக்கக் கோரி, காங்கிரஸ் எம்.பி. முகமது ஜாவத், மஜ்லிஸ் கட்சித் தலைவா் அஸாதுதீன் ஒவைஸி ஆகியோா் தரப்பில் உச்சநீதிமன்றத்தில் மனுக்கள் தாக்கல் செய்யப்பட்டுள்ளன.

‘அரசமைப்புச் சட்ட பிரிவுகள் மீறல்’: மக்களவை காங்கிரஸ் கொறடாவான ஜாவத், வக்ஃப் மசோதா மீதான நாடாளுமன்றக் குழுவில் உறுப்பினராக இருந்தவா். அவரது மனுவில் கூறப்பட்டுள்ளதாவது:

ஒருவா் மதத்தை பின்பற்றும் காலகட்டத்தை அடிப்படையாகக் கொண்டு, வக்ஃப் சொத்துகளை உருவாக்குவதற்கான கட்டுப்பாடுகளை இம்மசோதா அறிமுகம் செய்கிறது. இஸ்லாமிய சட்டம், வழக்கம் அல்லது முன்னுதாரணங்களின்படி, இத்தகைய கால வரம்புக்கு எந்த அடிப்படையும் இல்லை. இது, அரசமைப்புச் சட்டத்தின் 25-ஆவது பிரிவின்கீழ் மதத்தை ஏற்றுக் கொள்வதற்கும், பின்பற்றுவதற்குமான அடிப்படை உரிமையை மீறுகிறது.

அண்மைக் காலத்தில் இஸ்லாத்தை ஏற்று பின்பற்றுவோருக்கு பாகுபாடு காட்டுவதால், அரசமைப்புச் சட்டத்தின் 15-ஆவது பிரிவையும் மீறுகிறது.

தேவையற்ற தலையீடு: ஹிந்து மத அறக்கட்டளைகள் ஹிந்துக்களால் நிா்வகிக்கப்படும் நிலையில், வக்ஃப் நிா்வாக அமைப்புகளில் முஸ்லிம் அல்லாத உறுப்பினா்களை இடம்பெற செய்வது தேவையற்ற-பாரபட்சமான தலையீடாகும். இதன் மூலம் அரசமைப்புச் சட்டத்தின் 14, 15 ஆகிய பிரிவுகள் மீறப்படுகின்றன.

வக்ஃப் நிா்வாகத்தில் மாநில அதிகாரிகளுக்கு அளிக்கப்படும் கூடுதல் பங்கு, தங்கள் அமைப்புகளை நிா்வகிக்கும் முஸ்லிம்களின் உரிமையை பாதிக்கிறது. மத அமைப்புகள் மீதான கட்டுப்பாட்டை அரசு அதிகாரிகளிடம் ஒப்படைப்பது, வக்ஃப் நிா்வாகத்தில் தன்னாட்சியை நீா்த்துப் போக செய்வதுடன், அரசமைப்புச் சட்டத்தின் 26 (டி) பிரிவுக்கு எதிராக உள்ளது.

உச்சநீதிமன்ற தீா்ப்புக்கு எதிராக..: மத சொத்துகள் மீதான கட்டுப்பாட்டை மதச்சாா்பற்ற அதிகாரிகள் வசம் மாற்றுவது, மத ரீதியிலான உரிமையை மீறுவதாகும் என்று உச்சநீதிமன்றம் கடந்த 1954-இல் அளித்த தீா்ப்புக்கு எதிராக இம்மசோதா உள்ளது. நீண்ட கால பயன்பாட்டின் அடிப்படையில் வக்ஃப் சொத்தை உறுதி செய்யும் கருத்தாக்கத்தை தற்போதைய மசோதா கைவிடுகிறது. ராமஜென்மபூமி-பாபா் மசூதி வழக்கு தீா்ப்பில் இக்கோட்பாடு உறுதி செய்யப்பட்ட நிலையில், அதற்கு எதிராக இத்திருத்தம் உள்ளது என்று மனுவில் குற்றஞ்சாட்டப்பட்டுள்ளது.

ஒவைஸி மனுவில், ‘வக்ஃப் சொத்துகள் மீதான சட்டபூா்வ பாதுகாப்புகளைப் பறிப்பது, முஸ்லிம்களைக் குறிவைக்கும் பாரபட்சமான நடவடிக்கையாகும். வக்ஃப் வாரியங்களில் முஸ்லிம் அல்லாத உறுப்பினா்களை நியமிப்பது, அரசமைப்புச் சமநிலையை சீா்குலைப்பதுடன், முஸ்லிம்களின் உரிமையை பாதிக்கிறது’ என்று குற்றஞ்சாட்டப்பட்டுள்ளது.

குடியரசுத் தலைவரை சந்திக்கத் திட்டம்: வக்ஃப் சட்டத்திருத்த மசோதா தொடா்பாக குடியரசுத் தலைவா் திரெளபதி முா்முவை அவசரமாக சந்திக்க நேரம் கோரியுள்ளதாக அனைத்து இந்திய முஸ்லிம் தனிநபா் சட்ட வாரியம் தெரிவித்துள்ளது.

மசோதா தொடா்பான தங்கள் ஆழ்ந்த கவலையை வெளிப்படுத்தவும், நாடு முழுவதும் இஸ்லாமிய சமூகம் மீது அந்த மசோதா ஏற்படுத்தக் கூடிய தாக்கம் குறித்தும் பேச வேண்டும் என்பதே குடியரசுத் தலைவருடனான சந்திப்பின் நோக்கம் என்று தெரிவிக்கப்பட்டுள்ளது.