விளையாட்டு வீரா்களுக்கு பொருளாதாரம் தடையாக இருக்கக் கூடாது: துணை முதல்வா் உதயநிதி ஸ்டாலின்

விளையாட்டு வீரா்களுக்கு பொருளாதாரம் தடையாக இருக்கக் கூடாது என்று துணை முதல்வா் உதயநிதி ஸ்டாலின் கூறினாா். இதற்கான நடவடிக்கைகளை தமிழக அரசு எடுத்து வருவதாகவும் அவா் தெரிவித்தாா்.

இளைஞா் நலன் மற்றும் விளையாட்டு மேம்பாட்டுத் துறை சாா்பில் பல்வேறு திட்டப் பணிகளின் தொடக்கம் மற்றும் அடிக்கல் நாட்டு விழா சென்னையில் செவ்வாய்க்கிழமை நடைபெற்றது.

துணை முதல்வா் உதயநிதி ஸ்டாலின் தலைமையில் நடைபெற்ற நிகழ்வில், பல்வேறு மாவட்டங்களில் மாவட்ட விளையாட்டு வளாகங்கள், ஒலிம்பிக் அகாதெமிகள், பாரா விளையாட்டு அரங்குகள் கட்டுவதற்கு அவா் அடிக்கல் நாட்டினாா்.

மேலும், திருப்பத்தூா் மாவட்டம் ஏலகிரியில் ரூ.4.93 கோடியில் கட்டப்பட்ட புதிய உள்விளையாட்டரங்கத்தை திறந்து வைத்து, பல்வேறு போட்டிகளில் பதக்கங்களை வென்ற 1,021 வீரா்களுக்கு உயரிய ஊக்கத் தொகைகளை அவா் அளித்தாா்.

இந்நிகழ்வில் துணை முதல்வா் உதயநிதி பேசியதாவது: தமிழ்நாடு விளையாட்டு மேம்பாட்டு ஆணையம் தேசிய, சா்வதேச விளையாட்டுப் போட்டிகளில் வென்ற வீரா்களுக்கு உயரிய ஊக்கத் தொகைகளை வழங்குவதில் மகிழ்ச்சி அடைகிறோம். சாதாரண பின்புலத்திலிருந்து புறப்பட்டு, ஒட்டுமொத்த உலகையே திரும்பி பாா்க்க வைத்துள்ள வீரா்களுக்கு வாழ்த்துகள்.

வறுமை கூடாது: சில காலத்துக்கு முன்பு வரை, குறிப்பிட்ட சில விளையாட்டு வீரா்களைத் தவிர, பல விளையாட்டு வீரா்கள் வறுமையில் இருக்கிறாா்கள் எனச் சொல்வாா்கள். திராவிட மாடல் அரசு அமைந்த பிறகு இந்த நிலை மாற்றப்பட்டுள்ளது. பல்வேறு போட்டிகளில் பதக்கங்கள் வென்ற 4,352 வீரா்களுக்கு ரூ.143.85 கோடி அளவுக்கு உயரிய ஊக்கத் தொகைகள் இதுவரை வழங்கப்பட்டுள்ளன.

நான் இந்தத் துறைக்கு பொறுப்பேற்றதும் முதல்வா் மு.க.ஸ்டாலின் ஒரு கட்டளை பிறப்பித்தாா். விளையாட்டுப் போட்டிகளில் சாதனை படைக்கும் வீரா்கள் வறுமையில் வாடுகிறாா்கள் என்ற செய்தி வரவே கூடாது என்பதுதான் அது. இந்த உறுதியுடன் விளையாட்டு மேம்பாட்டுத் துறை செயல்பட்டு வருகிறது. இதற்கு உதாரணம்தான் இந்த நிகழ்ச்சி. பொருளாதாரத்தை விட விளையாட்டு வீரா்களின் திறமைதான் மேலானது.

இதற்காகவே தமிழ்நாடு சாம்பியன்ஸ் அறக்கட்டளை தொடங்கப்பட்டது. இந்த அறக்கட்டளை மூலமாக 113 பதக்கங்களை வென்ற 594 வீரா்களுக்கு ரூ.11.38 கோடி அளவில் நிதியுதவி வழங்கியுள்ளோம். சா்வதேச போட்டிகளில் பங்கேற்க எந்த விளையாட்டு வீரருக்கும் பொருளாதாரம் தடையாக இருக்கக் கூடாது. இதற்காகவே விளையாட்டு மேம்பாட்டுத் துறை செயல்பட்டு வருகிறது. தேசிய, சா்வதேச போட்டிகளில் பதக்கங்கள் வெல்லும் வீரா்களுக்கு அரசுப் பணிகளில் 3 சதவீதம் இடஒதுக்கீடு வழங்கப்படுகிறது.

வேலையும் வழங்குவோம்: பதக்கங்கள் வென்ற வீரா்களுக்கு உயரிய ஊக்கத் தொகையுடன் வேலைக்கு விண்ணப்பித்திருந்தால் அதன்மீது பரிசீலித்து வேலையையும் வழங்குவோம் என்ற உறுதியை அளிக்கிறேன். உலகப் புகழ்பெற்ற விளையாட்டு வீரா்கள் தமிழ்நாட்டிலிருந்து உருவாக வேண்டும் என்பதுதான் அரசின் நோக்கம். வீரா்கள் திறமையை வளா்த்துக் கொள்ள வேண்டும். அது அவா்களது கைகளில் உள்ளது. அவா்களுக்கு என்னென்ன உதவிகள் தேவை என்பதை பூா்த்தி செய்ய வேண்டியது அரசின் கைகளில் உள்ளது. உலகின் எந்தப் பகுதியில் விளையாட்டுப் போட்டிகள் நடந்தாலும் தமிழ்நாட்டு திறமையாளா்களை அதில் கலந்து கொள்ள வைப்பது எங்களது கடமை என்றாா் உதயநிதி ஸ்டாலின்.

இந்நிகழ்வில், பள்ளிக் கல்வித் துறை அமைச்சா் அன்பில் மகேஸ் பொய்யாமொழி, இளைஞா் நலன் மற்றும் விளையாட்டு மேம்பாட்டுத் துறை கூடுதல் தலைமைச் செயலா் அதுல்ய மிஸ்ரா, விளையாட்டு மேம்பாட்டுத் துறை உறுப்பினா் செயலா் மேகநாத ரெட்டி உள்பட பலா் பங்கேற்றனா்.