வேலூா் மத்திய சிறையில் அடைக்கப்பட்டிருந்த ஆயுள் தண்டனை கைதி உடல்நலக்குறைவால் திடீரென உயிரிழந்தாா்.
திருவண்ணாமலை மாவட்டம், கலசப்பாக்கம் அடுத்த தீன்பள்ளிப்பட்டு பகுதியைச் சோ்ந்த முனுசாமி மகன் ராஜா(49). இவா் கடந்த 2019-ஆம் ஆண்டு கொலை வழக்கில் கைது செய்யப்பட்டாா். நீதிமன்றத்தால் ஆயுள் சிறை தண்டனை விதிக்கப்பட்டிருந்த இவா், வேலூா் மத்திய சிறையில் அடைக்கப்பட்டிருந்தாா் . இவருக்கு உயா் ரத்த அழுத்தம், சா்க்கரை நோய் போன்ற உடல்நல பாதிப்புகள் ஏற்கனவே இருந்ததாக கூறப்படுகிறது. இதற்கு வேலூா் மத்திய சிறையிலுள்ள மருத்துவமனையில் அவ்வப்போது சிகிச்சை பெற்று வந்தாா்.
இந்நிலையில், ராஜா திங்கள்கிழமை திடீரென சிறையில் மயங்கி விழுந்தாா். சிறைக்காவலா்கள் அவரை மீட்டு சிறை மருத்துவமனைக்கு அழைத்துச் சென்று அங்கிருந்து மேல் சிகிச்சைக்காக அடுக்கம்பாறை அரசு மருத்துவமனைக்கு கொண்டு செல்லப்பட்டாா். ஆனால், வழியிலேயே ராஜா உயிரிழந்தாா்.
இச்சம்பவம் குறித்து ஜெயிலா் சிவபெருமாள் அளித்த புகாரின்பேரில் பாகாயம் போலீஸாா் வழக்குப்பதிவு செய்து விசாரணை நடத்தி வருகின்றனா்.
