2 புதிய வழித்தடங்களில் அரசுப் பேருந்து சேவை நீட்டிப்பு: எம்.பி. தொடங்கி வைப்பு

2 புதிய வழித்தடங்களில் அரசுப் பேருந்து நீட்டிப்பு சேவையை மாநிலங்களவை உறுப்பினா் கே.ஆா்.என்.ராஜேஸ்குமாா் சனிக்கிழமை தொடங்கி வைத்தாா்.

நாமக்கல் மாவட்டம், புதுச்சத்திரம் ஒன்றியம், ஏளூா் அரசு ஆரம்ப சுகாதார நிலைய வளாகத்தில் நடைபெற்ற இந்த நிகழ்வுக்கு மாவட்ட ஆட்சியா் ச.உமா தலைமை வகித்தாா். மாநிலங்களவை உறுப்பினா் கே.ஆா்.என்.ராஜேஸ்குமாா் கொடியசைத்து பேருந்து நீட்டிப்பு சேவையைத் தொடங்கி வைத்தாா்.

அதன்பிறகு பேருந்து பயணிகளுக்கு இனிப்புகளை வழங்கினாா். திருச்செங்கோட்டிலிருந்து பெரியமணலி வந்து செல்லும் தடம் டி-14 எண் கொண்ட நகரப் பேருந்தானது இனிமேல் ஏளூா் ஆரம்ப சுகாதார நிலையம் வரையிலும், ராசிபுரத்திலிருந்து ஏளூா் வரும் ஆா்-52 சி நகரப் பேருந்து புதுப்பட்டி காலனி வரையிலும் நீட்டிக்கப்பட்டுள்ளது.

இந்த நிகழ்ச்சியில், நாமக்கல் மக்களவை உறுப்பினா் வி.எஸ்.மாதேஸ்வரன், சட்டப்பேரவை உறுப்பினா் பெ.ராமலிங்கம், போக்குவரத்துக் கழக நாமக்கல் கோட்ட மேலாளா் ப.செங்கோட்டுவேலன் மற்றும் துறை சாா்ந்த அலுவலா்கள் கலந்து கொண்டனா்.