Doctor Vikatan: சித்த மருந்துகளில் உலோகக் கலப்பு; பாதுகாப்பானதா, பக்க விளைவுகளைத் தருமா?

Doctor Vikatan: சித்த மருந்துகள்  தயாரிப்பில்  உலோகங்கள் பயன்படுத்துவார்கள் என்று கேள்விப்பட்டேன். இது எந்த அளவுக்கு உண்மை. இப்படி உலோகங்கள் சேர்த்துத் தயாரிக்கப்படும் சித்த மருந்துகள் எந்த அளவுக்கு உடலுக்குப் பாதுகாப்பானவை?

பதில் சொல்கிறார், திருப்பத்தூரைச் சேர்ந்த அரசு சித்த மருத்துவர் விக்ரம்குமார்

சித்த மருந்துகளைப் பொறுத்தவரை பல விஷயங்களில் இருந்தும் மருந்துகள் தயாரிக்கப்படும். அப்படிப் பார்த்தால் அடிப்படையில், மூலிகைகள், அடுத்து  தாதுப்பொருள்கள் என்று சொல்லக்கூடிய உலோகங்கள், பிறகு விலங்கினங்களிடம் இருந்து பெறப்படும் பொருள்கள் என எல்லாவற்றிலிருந்தும் மருந்துகள் தயாரிக்கப்படுவதுண்டு.

சித்த மருந்துகளைப் பொறுத்தவரை மூலிகைகள்தான் அடிப்படை.  'வேர்ப்பாரு தழைப்பாரு மிஞ்சினக்கால் பற்பசெந்தூரம் பாரு' என்பது சித்த மருத்துவத்தின் கோட்பாடு. 

அதாவது முதலில் மூலிகைகளை முயற்சி செய்து பாருங்கள்... அவற்றில் பலன் கிடைக்காதபோது உலோகங்களை முயற்சி செய்து பாருங்கள் என்பது இதன் அர்த்தம்.

சித்த மருந்துகளில் உலோகங்கள் பயன்படுத்துவது உண்டு என்றாலும், பலரும் நினைக்கிற மாதிரி, மருந்துகளுக்குள் நேரடியாக உலோகங்களைப் புகுத்திக் கொடுக்க மாட்டார்கள். இங்குதான் சித்த மருத்துவ தத்துவமும் அறிவியலும் உண்மையாகிறது.

மருந்துகளுக்கு உலோகங்களைப் பயன்படுத்தும்போது அது பலகட்டங்களைத் தாண்ட வேண்டியிருக்கும். உதாரணத்துக்கு, புடம் போடுவது, எரிப்பது போன்றவை.

இப்படி ஒவ்வொரு கட்டத்திலும் உலோகத்தின் தன்மை மாறும்.  இதன் பின்னணியில் மிகப்பெரிய அறிவியல் இருக்கிறது. அதன் பிறகுதான் அது மருந்தாகவே உருவாகும். 

ஓர் உலோகத்தைச் சுத்திகரிப்பது எப்படி, அதை நானோ துகள்களாக, பற்பமாக மாற்றுவது எப்படி என பல கட்டங்கள் நடைபெறும். பெரும்பாலும் உலோகங்களை வைத்துச் செய்யப்படும் மருந்துகள், பற்பம் அல்லது செந்தூரமாக இருக்க வாய்ப்புகள் அதிகம்.

அந்த மருந்துகளை தேன் கலந்தோ, கஷாயத்துடனோ சாப்பிட வேண்டியிருக்கும். உலோகம் என்பது தனியே இருக்கும்போது அதன் தன்மைகள் வேறாக இருக்கும். அதுவே மருந்தாக மாறும்போது வேறு தன்மைகள் பெறும். அதனால் அவை பக்க விளைவுகளை ஏற்படுத்தாமல், உடலுக்கு நல்லதை மட்டுமே தரும். அதுதான் சித்த மருந்துகளின் சிறப்பே.

கேன்சர் போன்ற பெரிய நோய்களுக்குக்கூட செந்தூரம் போன்ற மருந்துகளைப் பயன்படுத்துவது, அவர்களது ஆயுளை நீட்டிப்பது தொடர்பாக ஆய்வுகள் நடந்துகொண்டிருக்கின்றன. 

பல வருடங்களுக்கு முன்பே, ஹெச்ஐவி நோய்க்கு செந்தூர மருந்துகள் கொடுத்து சோதிக்கப்பட்டுள்ளன. பெரு மருந்துகள் எனப்படும் சித்த மருந்துகள் பெரும்பாலும் இப்படி உலோகங்கள் பயன்படுத்திச் செய்யப்படுபவையாக இருக்கும். எனவே, அவை பாதுகாப்பானவைதான். பயம் வேண்டாம். 
 
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.