JPC: 'ஒரே நாடு ஒரே தேர்தல்' - பிரியங்கா காந்தி இடம்பெற்ற நாடாளுமன்ற கூட்டுக் குழுவின் வேலை என்ன?

'ஒரே நாடு, ஒரே தேர்தல்' மசோதாவை பா.ஜ.க அரசு நாடாளுமன்றத்தில் அறிமுகப்படுத்தியதும், அதற்குப் பெரியளவில் எதிர்ப்பு கிளம்பியது. இந்த மசோதாவிற்கு ஆதரவாக 269 உறுப்பினர்களும், எதிராக 196 உறுப்பினர்களும் வாக்களித்தனர்.

மேலும், நாடாளுமன்றத்தின் உள்ளேயும், வெளியேவும் அதற்கு எதிரான குரல்களும், போராட்டங்களும் வெடித்து வருகின்றன.

அதனால், இந்த திட்டம் குறித்து முடிவெடுக்கக் கூட்டு நாடாளுமன்றக் குழு ஒன்றை மத்திய அரசு நியமித்துள்ளது. அந்தக் குழுவில் 27 மக்களவை உறுப்பினர்கள், 12 மாநிலங்களவை உறுப்பினர்கள் என மொத்தம் 39 பேர் இடம்பெற உள்ளனர்.

இந்நிலையில், நேற்று முன்தினம் (டிசம்பர் 18) அம்பேத்கர் குறித்து அமித் ஷா பேசியதற்குக் கடும் எதிர்ப்புகள் கிளம்பி இரண்டு நாளாக இரு அவையிலும் அமளி ஏற்பட்டது. அதனால், இரு அவைகளும் ஒத்திவைக்கப்பட்டன. இன்று (டிசம்பர் 20) மக்களவை கூட்டத்தொடர் அமளியில் தொடங்கியிருந்தாலும், அவையை ஒத்தி வைப்பதற்கு முன்பு, இந்த மசோதா நிறைவேற்றப்பட்டது.

இந்த குழுவில் பிரியங்கா காந்தியும் இடம்பெற்றிருக்கிறார். இந்தக் குழுவின் செயல்பாடு என்ன என்பதைப் பார்ப்போம்.

நாடாளுமன்ற கூட்டுக் குழு

பொதுவாகவே, நாடாளுமன்ற கூட்டுக் குழு என்பது குறிப்பிட்ட விஷயங்களில் அல்லது மசோதாவில் எதாவது எதிர்ப்போ, சந்தேகமோ எழுந்தால்தான் அமைக்கப்படும். இந்த குழுவில் இரண்டு அவை உறுப்பினர்களும் இடம்பெற்றிருப்பார்கள்.

இந்தக் குழு அரசின் எந்தத் தூண்டுதல்களும் இல்லாமல் தன்னிச்சையாகச் செயல்பட்டு அறிக்கையைத் தயார் செய்யும்.

இந்தக் குழு அறிக்கையைத் தயார் செய்து சமர்ப்பித்த பின்னர், இந்தக் குழு கலைக்கப்படும். ஆனால், இந்தக் குழு தரும் அறிக்கை தான் இறுதியானது என்பதில்லை. அரசு வேண்டுமென்றால் கூடுதல் விசாரணைக்குக் கூட செல்லலாம்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MadrasNallaMadras