நிரம்பிய சித்தேரி...
ஃபெஞ்சல் புயல் காரணமாக விழுப்புரம் மாவட்டம் கூட்டேரிப்பட்டு கிராமத்தில் சித்தேரி ஏரி நிரம்பி வழிகிறது.
நிரம்பி வழியும் கிடங்கள் ஏரி!
ஃபெஞ்சல் புயல் காரணமாக விழுப்புரம் மாவட்டம் திண்டிவனத்தில் உள்ள கிடங்கள் ஏரி நிரம்பி வழிகிறது .
முதல்வர் ஸ்டாலின் ஆய்வு:
தென்மேற்கு வங்கக்கடலில் உருவான ஃபெஞ்சல் புயல் நேற்று முன்தினம் (30.11.2024) கரையைக் கடந்தும் தமிழகத்தின் பல்வேறு வட மாவட்டங்களில் தொடர்ந்து கனமழை பெய்து வருகிறது. குறிப்பாக, விழுப்புரம், கிருஷ்ணகிரி, திருவண்ணாமலை உள்ளிட்ட மாவட்டங்கள் பெரும் சேதத்தை எதிர்கொண்டிருக்கின்றன. இந்த நிலையில், புயல் பாதிப்பு ஏற்பட்ட மாவட்டங்களுக்கு நேரில் சென்று ஆய்வு மேற்கொண்டுவரும் முதல்வர் ஸ்டாலின், செய்தியாளர்களைச் சந்தித்துப் பேசினார்.
அப்போது, ``விழுப்புரம், கிருஷ்ணகிரி உள்ளிட்ட மாவட்டங்களில் இதுவரை கண்டிராத மழை பெய்திருக்கிறது. விழுப்புரம், கடலூர், திருவண்ணாமலை ஆகிய மூன்று மாவட்டத்தில் 600-க்கும் மேற்பட்ட தீயணைப்பு வீரர்கள், 900 மின் பணியாளர்கள் மீட்புப் பணியில் ஈடுபட்டுள்ளனர். தண்ணீர் வடிந்த பகுதிகளில் உடனுக்குடன் மின்சாரம் வழங்க நடவடிக்கை மேற்கொள்ளப்பட்டிருக்கிறது. மழை முழுமையாக நின்றதற்குப் பிறகு, பாதிக்கப்பட்ட மக்களுக்கு உரிய நிவாரணம் வழங்கப்படும். பாதிக்கப்பட்ட மக்களை உடனடியாக மீட்டு இயல்பு வாழ்க்கைக்குக் கொண்டு வர வேண்டும் என்று அதிகாரிகளுக்கு உத்தரவிட்டிருக்கிறேன்.
உயிரிழந்தோர் குடும்பங்கள், கால்நடைகள், சேதமடைந்த வீடுகளுக்கு நிவாரணம் வழங்கப்படும். ஃபெஞ்சல் புயல் பாதிப்புகளைப் பார்வையிட மத்திய அரசு, மத்தியக் குழுவை அனுப்புவதோடு, பாதிப்புக்கு ஏற்ற நிவாரணம் வழங்க வேண்டும் எனவும் கோரிக்கை வைப்போம். நிவாரண நிதி தர வேண்டியது ஒன்றிய அரசின் கடமை. ஆனால் ஒவ்வொரு முறையும் அதைச் செய்ய மறுக்கிறார்கள்" என்றார்.
