Sivakarthikeyan: `ஹேப்பி பர்த்டே 'பராசக்தி' ஹீரோ’ -இயக்குநர் சுதாகொங்கரா வெளியிட்ட 'பராசக்தி' வீடியோ

நடிகர் சிவகார்த்திகேயனுக்கு இன்று பிறந்த நாள்.

2012ம் ஆண்டு 'மெரினா'வில் ஹிரோவாகத் தொடங்கிய சிவகார்த்திகேயனின் திரைத்துறைப் பயணம், இன்று 25வது படமாக தமிழ்த் திரையுலகின் சக்தி மிகுந்த டைட்டிலான 'பராசக்தி'யாக உருவெடுத்துத் தொடர்ந்து கொண்டிருக்கிறது. கடந்தாண்டு தீபாவளி பண்டிகை வெளியீடாக சிவகார்த்திகேயன் நடித்திருந்த `அமரன்', அவரின் கரியரில் அதிக வசூலை ஈட்டிய திரைப்படமாக ஹிட் அடித்தது.

இதையடுத்து 'இறுதிச் சுற்று', 'சூரரைப் போற்று' என மெகா ஹிட் கொடுத்த இயக்குநர் சுதா கொங்கரா இயக்கத்தில் நடிக்கிறார் சிவகார்த்திகேயன். இப்படத்தில் ஜெயம் ரவி, அதர்வா, ஸ்ரீலீலா உள்ளிட்டோர் நடிக்கின்றனர். இப்படம் சிவகார்த்திகேயனின் '25' படம், ஜி.வி.பிரகாஷ் இசையமைக்கும் 100வது திரைப்படம் என்பது கூடுதல் ஸ்பெஷல்.

இப்படத்தின் டைட்டில் வெளியீட்டு வீடியோ வெளியாகி எதிர்பார்ப்பை எகிறச் செய்திருக்கிறது. இந்நிலையில் இன்று (பிப் 17) சிவகார்த்திகேயனின் பிறந்த நாளையொட்டி 'பராசக்தி' படப்பிடிப்புத் தளம், பட உருவாக்க வீடியோவை வெளியிட்டுள்ளது படக்குழு.

இதைத் தனது எக்ஸ் தளத்தில் பகிர்ந்துள்ள இயக்குநர் கொங்கரா, "பிறந்தநாள் வாழ்த்துகள் ஹீரோ. சினிமாவைத் தொடர்ந்து இயக்க வேண்டும் என்ற ஆர்வத்தைத் தூண்டுவது அதன் பயணம்தான். அந்த வகையில் உங்களோடு இணைந்து பயணித்து, பணியாற்றுவது மிகவும் மகிழ்ச்சியிருக்கிறது." என்று நெகிழ்ச்சியாகப் பதிவிட்டிருக்கிறார்.

பிறந்த நாள் வாழ்த்துகள் சிவகார்த்திகேயன். வெற்றிப் பயணம் தொடரட்டும், உச்சம் தொடட்டும்.