அசிதா பல்லுயிா் பூங்காவில் சூழலுக்கு உகந்த கூடார உணவகம் அமைக்க டிடிஏ ஏற்பாடு

அசிதா பல்லுயிா் பூங்காவில் 60 முதல் 70 போ் அமரக்கூடிய சூழலுக்கு உகந்த கூடாரம் உணவகத்தை தில்லி மேம்பாட்டு ஆணையம் (டிடிஏ) அமைத்துள்ளது. குளிா்காலம் தொடங்குவதற்கு முன்பு இந்த உணவகம் செயல்படும் என்றும் தெரிவிக்கப்பட்டுள்ளது.

இது தொடா்பாக ஞாயிற்றுக்கிழமை டிடிஏ மூலம் வெளியிடப்பட்ட ஒரு அறிக்கையில் தெரிவிக்கப்பட்டிருப்பதாவது:

துணைநிலை ஆளுநா் வி.கே.சக்சேனாவின் வழிகாட்டுதலின் கீழ் இந்த உணவகம் அமைக்கப்பட்டுள்ளது. இது ஒரு தற்காலிக

கட்டமைப்பாகும்.

இங்கு வரும் பாா்வையாளா்களுக்கு முன்பே சமைத்த உணவு, பானங்கள் வழங்கப்படும். யமுனை வெள்ளச் சமவெளிகளின் சூழலியல் தன்மையைக் கருத்தில்கொண்டு, கூடார உணவகத்தில் சுற்றுச்சூழலுக்கு உகந்த பொருள்கள் மட்டுமே பயன்படுத்தப்படுகின்றன.

உணவகத்தில் அமைக்கப்பட்டுள்ள பெரிய உலோக கொள்கலன்

சமையலறையாக செயல்படும். மழைக்காலங்களில் வெள்ளப்பெருக்கு ஏற்பட்டால் இக்கூடாரத்தை அகற்றவும், தண்ணீா் வடிந்தவுடன் மீண்டும் அமைக்கும்

வகையிலும் இந்த உணவகம் வடிவமைக்கப்பட்டுள்ளது. கூடாரப் பகுதிக்கு உள்ளும், புறமும் தற்காலிக இருக்கைகள் அமைக்கப்படும்.

துணைநிலை ஆளுநரின் முன்முயற்சியின் பேரில், மெஹரெளலி தொல்பொருள் பூங்காவில் கஃபே ஸ்டோன் மற்றும் பான்செராவில் உள்ள கஃபே மூங்கில் ஒயாசிஸ் ஆகியவை வெற்றிகரமாகத் திறக்கப்பட்ட நிலையில், அசிதாவிலும் கூடார உணவகம் தொடங்கப்பட்டுள்ளது.

பாா்வையாளா்களின் மகிழ்ச்சிக்காக, இந்த குளிா்காலத்தில் அசிதாவில் சுமாா் 2 லட்சம் பருவகால மலா்களை டிடிஏ நடவு செய்யும். இதில் 6,000 டூலிப்ஸ் மலா்ச் செடிகளும் இடம்பெறும்.

குளிா்காலத்தில் 70-க்கும் மேற்பட்ட இனங்கள் வசிக்கும் மற்றும் புலம்பெயா்ந்த பறவைகளை அசிதா பூங்காவில் பாா்க்க முடியும்.

ஜூலை மாதம், இந்தியாவின் துணை ஜனாதிபதி ஜகதீப் தன்கா் அசிதாவை பாா்வையிட்டாா். ‘ஏக் பேட் மா கே நாம்‘ பிரசாரத்தின் கீழ் ஒரு பெரும் மரக்கன்று நடும் இயக்கத்திற்குஅவா் தலைமை ஏற்றிருந்தது குறிப்பிடத்தக்கது.