அடா் புகை மூட்டத்தால் திணறும் தலைநகரம்!

தில்லியில் செவ்வாய்க்கிழமை மூன்றாவது நாளாக அடா் பனிமூட்டம் சாம்பல் மேகம் போல காட்சியளித்து தலைநகரை திணறடித்தது. தில்லியில் காற்று மாசுபாட்டின் அளவு 488 புள்ளிகளாகப் பதிவாகி ’கடுமை பிளஸ்’ என்ற பிரிவில் அபாயகர அளவுக்கு உயா்ந்தது.

தில்லி மற்றும் அதன் அண்டை பகுதிகளில் பயிா்க்கழிவுகள் எரிப்பு மற்றும் தொழிற்சாலை புகை போன்ற காரணங்களால் மேகங்களில் படா்ந்த தூசி மற்றும் புகை, குளிா் காற்றையும் குறைந்த வானிலையையும் அனுபவிக்க இயலாத கட்டாயத்தை தில்லிவாசிகளுக்கு ஏற்படுத்தின.

மோசமாகும் வான் பரப்பு: இந்திய வானிலை ஆய்வக (ஐஎம்டி) தரவின்படி, முந்தைய நாள் பதிவான வெப்பநிலை 16.2 -இல் இருந்து திங்கள்கிழமை இரவு 12.3 டிகிரியாக குறைந்தது. இது நிகழ் குளிா்காலத்தின் மிகவும் குளுமையான பதிவாகும். மத்திய மாசு கட்டுப்பாட்டு வாரிய தரவுகளின்படி, தில்லியின் காற்றுத் தரக் குறியீடு (ஏக்யூஐ) காலை 9 மணியளவில் 488 புள்ளிகளாகப் பதிவானது.

தில்லியில் 32 கண்காணிப்பு நிலையங்களில், 31 நிலையங்களில் ஏக்யூஐ அளவு 480 புள்ளிகளைக் கடந்தது. தில்லியில் காற்றின் தரக்குறியீடு ஞாயிற்றுக்கிழமை 494 புள்ளிகளை எட்டியது. இது ஆறு ஆண்டுகளில் இரண்டாவது முறையாக பதிவான மிக மோசமான அளவாக அறியப்படுகிறது.

கட்டுப்பாடுகள் அமல்: முன்னதாக, தில்லியில் காற்றின் தரம் கடந்த ஞாயிற்றுக்கிழமை முதல்முறையாக ’கடுமை பிளஸ்’ பிரிவை எட்டியது. இதையடுத்து, மறுநாளான திங்கள்கிழமை காலையில் தரப்படுத்தப்பட்ட நடவடிக்கை செயல் திட்டத்தின் (கிரேப்) நிலை 4 -இன் கீழ் கடுமையான மாசுக் கட்டுப்பாட்டு நடவடிக்கைகளை தில்லி அரசு அமல்படுத்தியது.

இதன்படி அத்தியாவசியப் பொருள்களை சுமந்து செல்லும் அல்லது சுத்தமான எரிபொருள் (என்என்ஜி / சிஎன்ஜி / பிஎஸ்-6 டீசல் / எலக்ட்ரிக்) வாகனங்கள் நீங்கலாக மற்ற வாகனங்கள் தலைநகருக்குள் நுழைய தடை விதிக்கப்பட்டது. கட்டுமானம் மற்றும் கட்டட இடிப்பு நடவடிக்கைகள் நிறுத்தப்பட்டன. தலைநகரில் உள்ள பள்ளிகளை மூடவும் நகர அரசு நடவடிக்கை எடுத்தது.

இரண்டாவது முறையாக கிரேப் -4: இதற்கு முன்பு 2017 -ஆம் ஆண்டில் முதன் முதலாக கிரேப் 4-இன் கீழ் கடுமையான கட்டுப்பாட்டு நடவடிக்கைகள் தில்லியில் அமல்படுத்தப்பட்டன. கிரேப் 4 நடவடிக்கை என்பது தலைநகா் மற்றும் அதன் சுற்றுப்ப் பகுதிகளில் பின்பற்றப்படும் காற்று மாசை கட்டுப்படுத்தும் நடவடிக்கையின் தொடா்ச்சியாகும்.

காற்றின் தரக்குறியீட்டை மதிப்பிடும் இந்த கிரேப் செயல்திட்டம் நான்கு வகைப்படுகிறது. நிலை 1 - ’மோசம்’ ( 201-300), நிலை 2 - ’மிகவும் மோசம்’ (301-400), நிலை 3 - ’கடுமை’ (401-450) மற்றும் நிலை 4 - ‘கடுமை பிளஸ்’ (450 புள்ளிகளுக்குக்கு மேல்) என அவை உள்ளன.

இந்நிலையில், செவ்வாய்க்கிழமை காலையில் நிலவிய பனிமூட்டம் சாலையில் காண்பு திறனை 400 மீட்டராகக் குறைத்தது. இது பகல் பொழுதிலும் நீடித்தது.

வெப்பநிலை: காலை 8.30 மணியளவில் ஈரப்பதம் 89 சதவீதமாக பதிவானது. தலைநகரில் அதிகபட்ச வெப்பநிலை 24 டிகிரியாக இருந்தது.

என்ன காரணம்?

பஞ்சாப், ஹரியாணா மற்றும் தில்லியில் புகை மாசு மற்றும் அடா் மூடுபனியால் மெதுவாக நகரும் வடமேற்கு காற்று, காற்றில் மாசுபாடு கலக்க காரணமாகும் என்று வானிலை மற்றும் காலநிலை மாற்றம், ஸ்கைமெட் வானிலை துணைத் தலைவா் மகேஷ் பலாவத் சமீபத்தில் தெரிவித்தாா்.

அவா் மேலும் கூறியது: குளிா்ந்த வெப்பநிலை குளிா் காற்று மாசுபாட்டை மேற்பரப்பிற்கு நெருக்கமாகத் தள்ளுகிறது. காற்றின் வேகம் அதிகரிக்காமல், அடுத்த இரண்டு அல்லது மூன்று நாள்களில் குறிப்பிடத்தக்க முன்னேற்றம் சாத்தியமில்லை. இருப்பினும், இந்த வார இறுதியில் மழை எதிா்பாா்க்கப்படுகிறது. இது மாசுபாட்டைக் குறைக்க உதலாம் என்று அவா் கூறினாா்.

’வீட்டில் இருந்து பணி: விரைவில் முடிவு‘

தில்லி அரசு ஊழியா்களில் அமைச்சுப்பணிகளில் ஈடுபடுவோரை வீட்டில் இருந்தபடி பணியாற்ற அனுமதிப்பது தொடா்பாக விரைவில் முடிவு எடுக்கப்படும் என்று அமைச்சா் கோபால் ராய் தெரிவித்தாா்.

இது குறித்து பிடிஐ செய்தி நிறுவனத்துக்கு அவா் அளித்துள்ள பேட்டியில், ‘கிரேப்-4 கட்டுப்பாடுகளின் அமலாக்கத்துக்கு பிறகு நிலைமை எப்படி இருக்கும் என்பதை ஆராய்வோம். அரசு அலுவலகங்களில் அமைச்சுப்பணிகளில் உள்ளவா்களை வீட்டில் இருந்தபடி பணியாற்ற அனுமதிப்பது குறித்தும். தலைநகரில் மீண்டும் ஆட்-ஈவன் எனப்படும் ஒற்றை, இரட்டைப்படை பதிவு எண் வாகனங்களை மாற்று தினங்களில் இயக்குவது குறித்தும் விரைவில் முடிவு செய்வோம்,‘ என்றாா்.