அரசுத் திட்டப் பணிகளை விரைவாக முடிக்க வேண்டும்: அதிகாரிகளுக்கு ஆட்சியா் உத்தரவு

தண்டராம்பட்டு, துரிஞ்சாபுரம், கீழ்பென்னாத்தூா் ஊராட்சி ஒன்றியங்களில் மத்திய-மாநில அரசுத் திட்டங்களின் கீழ் மேற்கொள்ளப்படும் பணிகளை விரைவாக முடிக்க வேண்டும் என்று அதிகாரிகளுக்கு மாவட்ட ஆட்சியா் க.தா்ப்பகராஜ் உத்தரவிட்டாா்.

தண்டராம்பட்டு, துரிஞ்சாபுரம், கீழ்பென்னாத்தூா் ஊராட்சி ஒன்றியங்களில் நடைபெற்று வரும் வளா்ச்சித் திட்டப் பணிகளின் முன்னேற்றம் குறித்த ஆய்வுக் கூட்டங்கள் புதன்கிழமை நடைபெற்றன.

திருவண்ணாமலை மாவட்டத்தில் மொத்தம் 18 ஊராட்சி ஒன்றியங்கள் உள்ளன. இவற்றில் நடைபெற்று வரும் மத்திய-மாநில அரசுகளின் வளா்ச்சித் திட்டப் பணிகள், திட்டங்களின் செயல்பாடு குறித்து மாவட்ட ஆட்சியா் க.தா்ப்பகராஜ் அந்தந்த ஊராட்சி ஒன்றியங்களுக்கு நேரில் சென்று ஆய்வு செய்து வருகிறாா்.

அந்த வகையில், தண்டராம்பட்டு, துரிஞ்சாபுரம், கீழ்பென்னாத்தூா் ஆகிய 3 ஊராட்சி ஒன்றியங்களில் புதன்கிழமை ஒரே நாளில் தனித்தனியே ஆய்வுக் கூட்டங்களை நடத்தினாா். அந்தந்த ஊராட்சி ஒன்றிய அலுவலகங்களில் நடைபெற்ற ஆய்வுக் கூட்டங்களுக்கு மாவட்ட ஊரக வளா்ச்சி முகமையின் திட்ட இயக்குநா் மணி தலைமை வகித்தாா்.

ஆட்சியா் க.தா்ப்பகராஜ் ஆய்வு மேற்கொண்டு பேசியதாவது:

கலைஞரின் கனவு இல்லம், ஊரக குடியிருப்புப் பழுது நீக்கம் செய்யும் திட்டம், பிரதமரின் வீடு கட்டும் திட்டம், இலங்கைத் தமிழா்கள் வீடு கட்டும் திட்டம் ஆகியவற்றின் செயல்பாடுகளை விரைவுப்படுத்த வேண்டும்.

பிரதம மந்திரி கிராமச் சாலைகள் மேம்பாட்டுத் திட்டம், தூய்மை பாரத இயக்கம், முதல்வரின் கிராமச் சாலைகள் மேம்பாட்டுத் திட்டம், அனைத்து கிராம அண்ணா மறுமலா்ச்சித் திட்டம், நமக்கு நாமே திட்டம், பள்ளி உள்கட்டமைப்பு மேம்பாட்டுத் திட்டம், அயோத்திதாச பண்டிதா் குடியிருப்பு மேம்பாட்டுத் திட்டம் போன்ற மத்திய-மாநில அரசுத் திட்டங்களின் கீழ் மேற்கொள்ளப்படும் பணிகளை விரைவாக முடிக்க வேண்டும் என்றாா்.

ஆய்வுக் கூட்டங்களில், ஆட்சியரின் நோ்முக உதவியாளா் (வளா்ச்சி) கிருஷ்ணன், ஊரக வளா்ச்சித் துறை செயற்பொறியாளா் இளங்கோ, தண்டராம்பட்டு, துரிஞ்சாபுரம், கீழ்பென்னாத்தூா் வட்டார வளா்ச்சி அலுவலா்கள் மற்றும் அரசுத் துறை அலுவலா்கள் பலா் கலந்து கொண்டனா்.