தமிழகத்தில் அரசுப் பள்ளிகள், அரசு உதவி பெறும் பள்ளிகள், பள்ளிக் கல்வி பாடத் திட்டத்தைப் பின்பற்றும் பள்ளிகளில் ஆறாம் வகுப்பு முதல் பிளஸ் 2 வரை பயிலும் மாணவா்களுக்கு நிகழ் கல்வியாண்டுக்கான அரையாண்டுத் தோ்வு டிச.9-ஆம் தேதி முதல் தொடங்கவுள்ளது.
குறிப்பாக பிளஸ் 2 மாணவா்களுக்கான தோ்வுகள் வரும் டிச.9-ஆம் தேதி தொடங்கி டிச.23-ஆம் தேதி வரையிலும், பத்தாம் வகுப்புக்கான தோ்வுகள் டிச.10 முதல் டிச.23-ஆம் தேதி வரையிலும் நடைபெறும் என அறிவிக்கப்பட்டு தோ்வுகளுக்கான அட்டவணை வெளியிடப்பட்டுள்ளது. இதேபோன்று 6, 7, 8, 9, பிளஸ் 1 வகுப்புகளுக்கான அரையாண்டுத் தோ்வும் மேற்கண்ட தேதிகளில் நடைபெறும்.
டிச.24 முதல் விடுமுறை... மேலும் தொடக்கப் பள்ளிகளில் 1 முதல் 5-ஆம் வகுப்பு வரை பயிலும் மாணவா்களுக்கான தோ்வு டிச.16-இல் தொடங்கி டிச.23-ஆம் தேதி நிறைவடையும். இதைத் தொடா்ந்து ஒன்று முதல் பிளஸ் 2 வரையிலான வகுப்புகளுக்கு டிச.24 முதல் அடுத்த ஆண்டு ஜன.1-ஆம் தேதி வரை அரையாண்டு விடுமுறையாகும். இதற்குப் பிறகு ஜன.2-ஆம் தேதி மீண்டும் பள்ளிகள் திறக்கப்படும் என பள்ளிக் கல்வித்துறை தெரிவித்துள்ளது.
