ஆந்திர வியாபாரியிடம் ரூ.16 லட்சம் திருட்டு: பெண் உள்பட மூவா் கைது

ஆந்திர காய்கறி வியாபாரியிடம் ரூ.16 லட்சத்தைத் திருடிய மூவரை போலீஸாா் கைது செய்து, ரூ.10.50 லட்சத்தை மீட்டனா்.

ஆந்திர மாநிலம், குண்டூரைச் சோ்ந்தவா் வீராஜ மெய்லு (64). இவா், ஆந்திரத்தில் காய்கறி தரகு வியாபாரம் செய்து வருகிறாா். இவா், திண்டுக்கல் மாவட்டம், பழனியைச் சோ்ந்த வியாபாரிகளுக்கு காய்கறிகளை விற்பனைக்கு அனுப்பி வைத்தாா். இதற்கான பணத்தை வாங்குவதற்காக வீராஜமெய்லு, கடந்த 23-ஆம் தேதி பழனிக்கு வந்தாா்.

வியாபாரிகளிடம் வசூலான ரூ.16 லட்சத்தை எடுத்துக் கொண்டு, பழனியிலிருந்து திருச்சி செல்வதற்காக பேருந்தில் ஏறினாா். பணம் இருந்த பையை, பயணிகள் உடைமைகள் வைக்கும் இடத்தில் வைத்திருந்தாா். அந்தப் பேருந்து திண்டுக்கல் வந்தபோது, மா்ம நபா்கள் பணம் இருந்த பையை திருடிச் சென்றதை அறிந்த வீராஜ மெய்லு, திண்டுக்கல் வடக்கு காவல் நிலையத்தில் புகாா் அளித்தாா். இதையடுத்து, தனிப் படை அமைத்து குற்றவாளிகளை தேடும் பணியில் ஈடுபட்டனா்.

இந்த நிலையில் பணத்தை திருடிய சாணாா்பட்டி பகுதியைச் சோ்ந்த பாண்டித்துரை (47), மதுரை அலங்காநல்லூரைச் சோ்ந்த செல்வம் (54), இவரது மனைவி பிரியா (34) ஆகியோரை போலீஸாா் கைது செய்தனா். இவா்களிடமிருந்து ரூ.10.50 லட்சத்தை போலீஸாா் பறிமுதல் செய்தனா்.