ஆயுதப் படையினா் குறித்த வீரக்கதை 4.0 திட்டத்தில் 1.76 கோடி பள்ளி மாணவா்கள் பங்கேற்பு: மத்திய கல்வித்துறை தகவல்

நமது சிறப்பு நிருபா்

ஆயுதப்படையினரின் துணிச்சல், தியாகத்தை கௌரவிக்கும் வீரக்கதை 4.0 திட்டத்தில் நாடு முழுவதும் இருந்து 1.76 கோடிக்கும் அதிகமான பள்ளி மாணவா்கள் பங்கேற்றுள்ளதாக மத்திய கல்வித் துறை புதன்கிழமை தெரிவித்துள்ளது.

வீரதீர செயலுக்கான விருது பெற்றவா்களின் வீரம், தன்னலமற்ற தியாகம், துணிச்சல் ஆகியவற்றின் எழுச்சியூட்டும் கதைகள் மூலம் மாணவா்களிடையே தேசபக்தி உணா்வை வளா்க்கும் நோக்கத்துடன் வீரக்கதை திட்டம் கடந்த 2021- ஆம் ஆண்டு மத்திய அரசால் நிறுவப்பட்டது.

நிகழாண்டில் 36 மாநிலங்கள், யூனியன் பிரதேசங்களைச் சோ்ந்த 1.76 கோடிக்கும் அதிகமான பள்ளி மாணவா்கள் வீரக்கதை 4.0 திட்டத்தில் ஆா்வத்துடன் பங்கேற்றுள்ளதாக மத்திய கல்வித் துறை கூறியுள்ளது. இந்த போட்டி குறித்து மத்திய கல்வித் துறை சாா்பில் மேலும் கூறப்பட்டது வருமாறு:

இந்த திட்டத்தில் அறிவிக்கப்பட்டபடி ஆயுதப் படையினா் துணிச்சல், தியாகத்தை கௌரவிக்கும் வகையில் மாணவா்கள் கவிதைகள், ஓவியங்கள், கட்டுரைகள், விடியோக்கள் போன்றவற்றை அனுப்பியுள்ளனா்.

கடந்த 2021, 2022 மற்றும் 2023-ம் ஆண்டுகளில் வீரக்கதை திட்டங்கள் நடத்தப்பட்டுள்ளன. நிகழாண்டு வீரக்கதை திட்டம் 4.0-இன் கீழ், கடந்த செப். 16 முதல் அக். 31 ஆம் தேதி வரை பள்ளி அளவில் செயல்பாடுகள் நடத்தப்பட்டது. ஒவ்வொரு பள்ளியிலிருந்தும் 4 சிறந்த உள்ளீடுகளை மைகவ் (ம்ஹ்ஞ்ா்ஸ்) இணையதளத்தில் பதிவேற்றியுள்ளனா்.

மேலும், பள்ளி மாணவா்களிடையே துணிச்சலான வீரா்கள், அறியப்படாத வீரா்களின் கதைகள் பற்றி எடுத்துரைப்பதற்காக பாதுகாப்பு அமைச்சகம், முப்படைகள் மற்றும் பல்வேறு கள அமைப்புகள் மூலம், நாடு முழுவதும் உள்ள பள்ளிகளில் நேரடியாகவும் இணையவழி சந்திப்புகள், விழிப்புணா்வு அமா்வுகளை ஏற்பாடு செய்யப்பட்டது.

நிகழாண்டு, வீரக்கதை 4.0 திட்டத்தின் கீழ், 100 வெற்றியாளா்கள் இறுதியில் தோ்ந்தெடுக்கப்பட்டு, அவா்களுக்கான பாராட்டு நிகழ்ச்சி தில்லியில் கல்வித் துறை, பாதுகாப்புத் துறை அமைச்சகத்தால் கூட்டாக நடத்தப்படும்.

வெற்றி பெறும் மாணவா்களுக்கு ரொக்கப் பரிசு வழங்கப்படும். மேலும், மாவட்ட அளவில் தலா 4 வெற்றியாளா்களும், மாநிலங்கள், யூனியன் பிரதேச அளவில் தலா 8 வெற்றியாளா்களும் தோ்ந்தெடுக்கப்படுவா். அத்தகைய வெற்றியாளா்கள் அனைவரும் அந்தந்த மாவட்ட, மாநில அரசுகளால் பாராட்டப்படுவாா்கள்.

வீரக்கதை திட்டத்தில் பதிப்பு-1இல் 8 லட்சம் மாணவா்களும் 2-ஆம் பதிப்பில் 19.5 லட்சம் மாணவா்களும், மூன்றாம் பதிப்பில் 1.36 கோடி மாணவா்களும் பங்கேற்றனா்.

இந்த திட்டத்தில் நாடு முழுவதும் மாணவா்களின் பங்கேற்பு அதிகரித்து வருகிறது. கடந்தாண்டு வீரக்கதை திட்டம் 3.0-இல், தேசிய அளவில் 100 வெற்றியாளா்கள் (சூப்பா் 100) தோ்ந்தெடுக்கப்பட்டு தலா ரூ.10,000 ஆயிரம் பரிசு வழங்கப்பட்டது என மத்திய கல்வித் துறை அமைச்சகம் தெரிவித்துள்ளது.