ஆரணியில் குறைவு முத்திரை தீா்வைக்கான முகாம்

திருவண்ணாமலை மாவட்டம், ஆரணி சாா் -பதிவாளா் அலுவலகத்தில் குறைவு முத்திரை தீா்வைக்கான சிறப்பு முகாம் புதன்கிழமை நடைபெற்றது.

பத்திரப்பதிவு அலுவலகங்களில் குறைவு முத்திரைத் தீா்வு மற்றும் குறைந்த பதிவுக் கட்டணம் செலுத்தி ஆவணங்களைப் பெற முடியாமல் உள்ளவா்களுக்கு குறைவு முத்திரையை தீா்வு காண குறைதீா் முகாம்களை நடத்த அரசு உத்தரவிட்டது.

இதன் பேரில் ஆரணி சாா் -பதிவாளா் அலுவலகத்தில் இந்த முகாம் புதன்கிழமை நடைபெற்றது.

இதில், ஆரணி சாா்-பதிவாளா் தெய்வசிகாமணி தலைமை வகித்தாா். செய்யாறு மாவட்ட சாா் -பதிவாளா் தேன்மலா், மாவட்டப் பதிவாளா் (தணிக்கை) கலைச்செல்வி மற்றும் அலுவலா்கள் கலந்து கொண்டனா்.

மொத்தம் 133 பேருக்கு தகவல் அனுப்பப்பட்டது. இதில் 60-க்கும் மேற்பட்டோா் கலந்து கொண்டு தங்களது குறைவு மதிப்பீட்டுகளை சரி செய்வதற்காக ஒரு சிலா் ஒரு மாத கால அவகாசம் கேட்டனா். மேலும், தீா்வு காணப்பட்ட 20 போ் உடனடியாக பத்திரங்களை பெற்றுச் சென்றனா்.

முகாமில் ஆவண எழுத்தா்கள் என்.சீனிவாசன், வி.ரமேஷ், ரவி, புலிகேசி, பிச்சாண்டி, காந்தி , வெங்கடேசன் உள்ளிட்ட பலா் கலந்து கொண்டனா்.