வடக்கு தில்லியின் அலிபூா் பகுதியில் இளைஞரைத் தாக்கி அவரது கைப்பேசி மற்றும் பணப்பையை பறித்ததாகக் கூறப்படும் தம்பதியை தில்லி போலீஸாா் கைது செய்துள்ளதாக அதிகாரிகள் செவ்வாய்க்கிழமை தெரிவித்தனா்.
இது குறித்து வடக்கு தில்லி காவல் சரக உயரதிகாரி கூறியதாவது: குற்றம் சாட்டப்பட்டவா்கள் தீபக் (24) மற்றும் அவரது மனைவி தீபாலி (23) என அடையாளம் காணப்பட்டுள்ளனா். அக்.29 அன்று அனுஜ் குமாா் (29) என்பவா் போலீஸில் ஒரு புகாா் அளித்தாா். அவா் வீடு திரும்பியபோது, குற்றம் சாட்டப்பட்டவா் மோட்டாா்சைக்கிளில் வந்து 1,500 ரூபாய் வைத்திருந்த பணப்பை மற்றும் கைப்பேசியை பறித்துச் சென்ாக புகாரில் கூறியிருந்தாா்.
இருவரும் அந்த இடத்திலிருந்து தப்பிச் செல்வதற்குள் அந்தப் பெண் பாதிக்கப்பட்டவரை கொடூரமாகத் தாக்கியுள்ளாா். அப்பகுதியில் இருந்து சிசிடிவி காட்சிகள் ஆய்வுக்குள்படுத்தப்பட்டது. இதைத் தொடா்ந்து, திங்கள்கிழமை இரவு அலிபூரில் இருந்து குற்றம்சாட்டப்பட்ட தம்பதியினரை போலீஸாா் கைது செய்தனா். இதில் தீபக் முன்பு இதேபோன்ற பல கிரிமினல் வழக்குகளில் தொடா்புடையவா் என்பது தெரிய வந்தது என அந்த அதிகாரி கூறினாா்.
