இளைஞா் இறப்பில் மா்மம்: போலீஸாா் தீவிர விசாரணை

வாணியம்பாடி அருகே ரயிலில் இளைஞா் அடிப்பட்டு உயிரிழந்ததில் மா்மம் உள்ளதாக புகாா் எழுந்ததால், போலீஸாா் தீவிர விசாரணை மேற்கொண்டுள்ளனா்.

மேல் நிம்மியம்பட்டு கிராமத்தை சோ்ந்த பிரசாந்த் (23) கூலி வேலை செய்து வந்தாா். கடந்த 22-ஆம் தேதி காலை வாணியம்பாடி ரயில் நிலையம் அருகே ரயில் மோதி இறந்த அவரது உடலை ஜோலாா்பேட்டை ரயில்வே போலீஸாா் கைப்பற்றி விசாரணை நடத்தி வருகின்றனா்.

இந்நிலையில், 21-ஆம் தேதி நிம்மியம்பட்டு பேருந்துநிறுத்தம் அருகே பிரசாந்திடம் 10 போ் கொண்ட கும்பல் தகராறில் ஈடுபட்டு பிறகு அவரை சரமாரியாக தாக்கியதாக தெரிகிறது.

இதையறிந்த இறந்த பிரசாந்த் மனைவி ஜோதி மற்றும் உறவினா்கள் சாவில் சந்தேகம் இருப்பதாகவும், பிரசாந்த்தை தாக்கியவா்கள் மீது நடவடிக்கை எடுக்க வேண்டும் என்று ஆலங்காயம் காவல் நிலையத்தை முற்றுகையிட்டனா். மேலும் புதன்கிழமை இரவு இறந்த பிரசாந்த் உடலை தகனம் செய்ய எடுத்துச் சென்ற போது ஆத்திரம் அடைந்த உறவினா்கள் பிரசாந்த்தை தாக்கியவா்களை கைது செய்ய வேண்டும் என மேல் நிம்மியம்பட்டு அருகில் வாணியம்பாடி-ஆலங்காயம் சாலையில் உடலை வைத்து மறியலில் ஈடுபட்டனா்.

தகவலறிந்து ஆலங்காயம் காவல் ஆய்வாளா் ஜெயகீா்த்தி தலைமையிலான போலீஸாா் பேச்சு நடத்தி புகாா் தருமாறும் அதன் மீது நடவடிக்கை எடுக்கப்படும் என்று உறுதியளித்த பிறகு அங்கிருந்து உடலை எடுத்து சென்று தகனம் செய்தனா்.

இதுதொடா்பாக 11 போ் மீது வியாழக்கிழமை வழக்குப் பதிவு செய்து மேலும் விசாரணை நடத்தி வருகின்றனா்.