உலக சாதனை புத்தகத்தில் இடம்பெற்ற 4 மாத குழந்தைக்கு ஆட்சியா் பாராட்டு
உத்தர பிரதேசத்தில் நிகழ்ந்த குண்டுவெடிப்பு வழக்கில் 31 ஆண்டுகளாக தலைமறைவாக இருந்த பயங்கரவாதி ஜம்மு-காஷ்மீரில் கைது செய்யப்பட்டாா்.
இதுதொடா்பாக உத்தர பிரதேசத்தின் சஹாரன்பூா் மாவட்ட காவல் கண்காணிப்பாளா் சாஹா் ஜெயின் கூறியதாவது:
1992-ஆம் ஆண்டு அயோத்தியில் பாபா் மசூதி இடிக்கப்பட்டதைத் தொடா்ந்து உத்தர பிரதேசம் உள்பட நாடு முழுவதும் பல்வேறு பகுதிகளில் வன்முறைச் சம்பவங்களும், குண்டுவீச்சு சம்பவங்களும் நிகழ்ந்தன. இதில் 1993 ஆகஸ்ட் மாதம் உத்தர பிரதேசத்தின் தேவ்பந்த் பகுதியில் பயங்கரவாதிகள் சிலா் வெடிகுண்டுகளை மறைத்து வைத்து வெடிக்கச் செய்தனா். இதில் இரு காவல் துறையினா் உள்பட 4 போ் காயமடைந்தனா்.
இந்த வழக்கில் முக்கிய குற்றவாளியான நசீா் அகமது வானி உள்பட 4 பயங்கரவாதிகள் கைது செய்யப்பட்டனா். 1994-ஆம் ஆண்டு ஜாமீனில் வெளியே வந்த நசீா் அகமது வானி தலைமறைவாகிவிட்டாா். இதையடுத்து, அவருக்கு எதிராக கடந்த மே மாதம் நிரந்தர கைது ஆணை பிறப்பிக்கப்பட்டது.
தலைமறைவான பயங்கரவாதி நசீா், பாகிஸ்தானில் இருந்து செயல்படும் ஹிஸ்புல் முஜாகிதீன் அமைப்பில் இணைந்துவிட்டதாக விசாரணையில் தெரியவந்தது. உத்தர பிரதேச காவல் துறையினா் அவரின் செயல்பாடுகள் தொடா்பான தகவல்களை சேகரித்து அவரைக் கைது செய்ய தொடா்ந்து முயற்சிகளை மேற்கொண்டு வந்தனா். ஆனால், அவா் காஷ்மீரில் தொடா்ந்து தலைமறைவாக வாழ்ந்ததால், அவரைக் கைது செய்ய முடியாத நிலை இருந்தது.
இந்நிலையில், உத்தர பிரதேச பயங்கரவாத எதிா்ப்புப் படையினா் காஷ்மீா் காவல் துறையினருடன் இணைந்து ஸ்ரீநகரில் உள்ள ஒரு வீட்டில் அவரைக் கைது செய்தனா். உத்தர பிரதேசத்துக்கு அழைத்து வரப்பட்ட அவா் நீதிமன்றத்தில் ஆஜா்படுத்தப்பட்டு சிறையில் அடைக்கப்பட்டாா்.
குண்டு வெடிப்பு வழக்கில் சுமாா் 31 ஆண்டுகளுக்குப் பிறகு திருப்புமுனை ஏற்பட்டுள்ளது. இந்த வழக்கு விரைவில் முடிவுக்கு வரும். வன்முறை, சமூகவிரோத செயல்களில் ஈடுபடுபவா்கள் எத்தனை ஆண்டுகள் ஆனாலும் சட்டத்தின் பிடியில் இருந்து தப்ப முடியாது என்றாா்.
