ஊத்துக்குளி மின் கோட்டத்தை செயல்படுத்த தொமுச கோரிக்கை

புதிதாக உருவாக்கப்பட்ட ஊத்துக்குளி மின்கோட்டத்தை உடனடியாக பயன்பாட்டுக்கு கொண்டு வர வேண்டும் என மின்வாரிய பொது ஒப்பந்த தொமுசவினா் கோரிக்கை விடுத்துள்ளனா்.

இது குறித்து தமிழ்நாடு மின்வாரிய பொது ஒப்பந்த தொமுச கூட்டமைப்பு இணை பொதுச் செயலாளா் சரவணன், அவிநாசி மின்வாரிய அலுவலகத்தில் அளித்த மனுவில் கூறியிருப்பதாவது:

ஊத்துக்குளி மின்நுகா்வோா் திருப்பூா், ஈரோடு ஆகிய இருமாவட்ட எல்லைக்கு உள்பட்ட பகுதியில் உள்ளனா். இதனால் மின் இணைப்பு, மின்கட்டண சேவைகளுக்காக மின்நுகா்வோா் பெருந்துறை, ஈரோடு, அவிநாசி, திருப்பூா் ஆகிய பகுதிகளுக்கு சென்று சிரமத்திற்குள்ளாகி வருகின்றனா். ஆகவே 2 ஆண்டுகளாக கிடப்பில் போடப்பட்டுள்ள ஊத்துக்குளி மின்கோட்டத்தை உடனடியாக பயன்பாட்டுக்கு கொண்டு வர வேண்டும். மேலும் அவிநாசி மின்பகிா்மானத்தில் உள்ள குன்னத்தூா் உபகோட்டத்தை ஊத்துக்குளி மின்கோட்டத்துடன் இணைக்க உடனடியாக நடவடிக்கை எடுக்க வேண்டும் எனக் குறிப்பிட்டுள்ளாா்.