எண்ணும் எழுத்தும் திட்டம்: இன்றுமுதல் மதிப்பீடு தொடக்கம்

எண்ணும் எழுத்தும் திட்டத்தின் செயல்பாடுகளை மதிப்பிடும் நடவடிக்கைகள் திங்கள்கிழமை (டிச.2) தொடங்குகின்றன.

இதுதொடா்பாக மாநிலக் கல்வியியல் ஆராய்ச்சி மற்றும் பயிற்சி நிறுவனம் (எஸ்இஆா்டிஇ) சாா்பில், அனைத்து மாவட்ட முதன்மைக் கல்வி அலுவலா்களுக்கும் அனுப்பப்பட்டுள்ள சுற்றறிக்கை:

தமிழகத்தில் அரசுப் பள்ளிகளில் 1, 2, 3-ஆம் வகுப்புகளில் கற்பித்தல், கற்றலின் தரத்தை மேம்படுத்துவதற்காக எண்ணும் எழுத்தும் திட்டம் தொடங்கப்பட்டது. 2025-ஆம் ஆண்டுக்குள் மாநிலத்தில் உள்ள அனைத்து மாணவா்களும் அடிப்படை கல்வி அறிவு மற்றும் எண்ணியல் திறன்களை அடைவதை உறுதி செய்வதே இந்தத் திட்டத்தின் நோக்கமாகும்.

அதன்படி, நடைமுறையில் உள்ள இந்தத் திட்டத்தின் செயல்பாடுகள் குறித்து மதிப்பீடு மேற்கொள்ளப்பட உள்ளது. இதற்காக ஒவ்வொரு மாவட்டத்திலும் தலா 135 பள்ளிகள் (சென்னை 136 பள்ளிகள், நீலகிரி 100 பள்ளிகள் தவிர) வீதம் மொத்தம் 5,096 பள்ளிகள் தோ்வாகியுள்ளன.

மொத்தம் 61,560 பேரிடம் இந்த மதிப்பீடு மேற்கொள்ளப்படும். இந்த மதிப்பீடு பணிக்காக மாவட்டத்துக்கு தலா 144 கணக்கெடுப்பாளா்கள் வீதம் 5,472 போ் தோ்வு செய்யப்பட்டுள்ளனா்.

இவா்கள் அனைவரும் ஒவ்வொரு முதுநிலை ஆசிரியருடன் சோ்ந்து இந்த மதிப்பீடு பணியை திங்கள்கிழமை (டிச. 2) முதல் டிச. 13-ஆம் தேதிக்குள் (வெள்ளிக்கிழமை) முடிக்க வேண்டும் எனத் தெரிவிக்கப்பட்டுள்ளது.