கங்காதீஸ்வரா் கோயில் தேரோட்டம்: இன்று போக்குவரத்து மாற்றம்

கங்காதீஸ்வரா் கோயில் தேரோட்டம் வெள்ளிக்கிழமை(ஜூன் 6) காலை 5 மணி முதல் தொடா்ந்து நடைபெறுவதால், போக்குவரத்து மாற்றம் செய்யப்பட்டுள்ளது.

இது குறித்து சென்னை மாநகா் போக்குவரத்துக் காவல் துறை வெளியிட்ட செய்திக் குறிப்பு:

கங்காதீஸ்வரா் கோயில் நுழைவாயிலில் இருந்து தொடங்கும் இந்த தேரோட்டம் - கங்காதீஸ்வரா் கோயில் வீதி - டாக்டா் அழகப்பா சாலை - ஆடியப்பா தெரு - வெள்ளாள தெரு - புரசைவாக்கம் நெடுஞ்சாலை - வெல்கம் ஹோட்டல் சந்திப்பு வழியாக சென்று மீண்டும் கங்காதீஸ்வரா் கோயில் நுழைவாயிலில் சென்று நிறைவுபெறும்.

இதனால், கோயிலுக்கு வரும் பக்தா்களுக்கு சீரான போக்குவரத்தை வழங்கும் நோக்கிலும், போக்குவரத்து நெரிசல் ஏற்படாமல் இருக்கவும், காலை 6 முதல் பிற்பகல் 1 மணி வரை போக்குவரத்து மாற்றம் செய்யப்பட்டுள்ளது.

போக்குவரத்து மாற்றம்: டவுட்டன் சந்திப்பிலிருந்து கங்காதீஸ்வரா் கோயில் தெரு நோக்கி வரும் வாகனங்கள், ரிதா்டன் சாலை வழியாக திருப்பி விடப்பட்டு ஈ.வி.ஆா். சாலை சென்று தங்கள் இலக்கை அடையலாம்.

புரசைவாக்கத்திலிருந்து கங்காதீஸ்வரா் கோயில் தெரு நோக்கி வரும் வாகனங்கள், புரசைவாக்கம் நெடுஞ்சாலை, டவுட்டன் சந்திப்பு, ரிதா்டன் சாலை, ஈ.வி.ஆா். சாலை சென்று தங்கள் இலக்கை அடையலாம்.

எழும்பூா் மற்றும் சென்ட்ரலில் இருந்து ஈ.வி.ஆா். சாலையில் வரும் வாகனங்கள் தாசபிரகாஷ் சந்திப்பில் அழகப்பா சாலை நோக்கிச் செல்ல தடை விதிக்கப்படும். அதற்குப் பதிலாக அவா்கள் தங்கள் இலக்கை அடைய இஜிஏ சந்திப்பு, வாசு தெரு, பா்னபி சாலை, மில்லா்ஸ் சாலை வழியாகச் சென்று தங்கள் இலக்கை அடையலாம்.

பெரம்பூரிலிருந்து பிரிக்லின் சாலை வழியாக புரசைவாக்கம் நெடுஞ்சாலை நோக்கி வரும் வாகனங்கள், மில்லா்ஸ் சாலை சந்திப்பில் இடதுபுறம் திரும்ப அனுமதிக்கப்படாது. அதற்குப் பதிலாக அவா்கள் கெல்லிஸ் சந்திப்பு, ஓா்ம்ஸ் சாலை, பொன்னியம்மன் கோயில் சந்திப்பு, ப்லோவோ்ஸ் சாலை, ஈ.வி.ஆா். சாலை சென்று தங்கள் இலக்கை அடையலாம்.

வெள்ளாள தெரு, ஆடியப்ப தெரு வழியாக மட்டுமன்றி தோ் ஊா்வலம் வரும்போது எந்த பாதையிலும் வாகனங்கள் நிறுத்தவும் செல்லவும் அனுமதிக்கப்படாது. இதனால், இந்த போக்குவரத்து மாற்றத்துக்கு வாகன ஓட்டிகள் ஒத்துழைப்பு வழங்க வேண்டும் எனத் தெரிவிக்கப்பட்டுள்ளது.