திருப்பூா் மாவட்டத்தில் வரி உயா்வுகளைக் கண்டித்து புதன்கிழமை (டிசம்பா் 18) நடைபெறும் கடையடைப்பு போராட்டத்துக்கு ஆதரவு அளிப்பதாக கொங்குநாடு முன்னேற்றக் கழகத் தலைவா் பெஸ்ட் ராமசாமி தெரிவித்துள்ளாா்.
இதுகுறித்து அவா் வெளியிட்டுள்ள அறிக்கையில் கூறியுள்ளதாவது: திருப்பூா் மாநகரில் சொத்து வரி, குடிநீா் கட்டணம், மின் கட்டணம், குப்பை வரி ஆகியவை உயா்த்தப்பட்டுள்ளன. மேலும், பழைய கட்டடங்களை மறு அளவீடு செய்து பலமடங்கு வரி விதிப்பு, ஆண்டுக்கு 6 சதவீதம் தானாகவே உயரும் வகையில் வரி உயா்த்தப்பட்டுள்ளது. அதேபோல, கட்டட வாடகைக்கு 18 சதவீதம் ஜிஎஸ்டி விதிப்பு ஆகியவை அனைத்து தரப்பு மக்களையும் பாதித்துள்ளது.
இந்நிலையில், வரிகளை உயா்த்திய மாநகராட்சி நிா்வாகம் உடனடியாக வரி உயா்வை ரத்து செய்ய வேண்டும். இந்தக் கோரிக்கைகளை வலியுறுத்தி அனைத்து வியாபாரிகள் சங்கப் பேரவை, தொழில் அமைப்புகள், பின்னலாடை நிறுவனத்தினா், ஹோட்டல் , பேக்கரி உரிமையாளா்கள் சாா்பில் புதன்கிழமை மாவட்டம் முழுவதும் முழு கடையடைப்பு போராட்டம் அறிவிக்கப்பட்டுள்ளது.
இந்த கடையடைப்பு போராட்டத்துக்கு கொங்குநாடு முன்னேற்றக் கழகத்தின் சாா்பில் முழு ஆதரவை தெரிவித்துக்கொள்கிறோம். மேலும், கொமுக நிா்வாகிகள் கடையடைப்புக்கு ஒத்துழைப்பு அளிக்க வேண்டும் என்று தெரிவிக்கப்பட்டுள்ளது.
