கொத்தட்டை சுங்கச்சாவடி: தனியார் பேருந்து உரிமையாளர்கள் போராட்டம்
ஆவடி: ஆவடி, அம்பத்தூர் பகுதிகளில் உள்ள வீடுகளில் இருந்து வெளியேறி கலக்கும் கழிவுநீரால் புழல் ஏரி தொடர்ந்து மாசடைந்து வருகிறது.
நீர்வள ஆதாரத் துறை அதிகாரிகள் நடவடிக்கை எடுக்க வேண்டும் என பொதுமக்கள் வலியுறுத்தினர்.
சென்னைக்கு குடிநீர் வழங்கும் ஏரிகளில் புழல் ஏரி முக்கிய பங்கு வகிக்கிறது. இதன் மொத்த கொள்ளளவு 3,300 மில்லியன் கனஅடி. 20.86 சதுர மைல் பரப்பளவு கொண்டது. இந்த ஏரியை நீர்வள ஆதாரத் துறை பாராமரித்து வருகிறது.
புழல் ஏரியின் கரை செங்குன்றம், புழல், சூரப்பட்டு, சண்முகபுரம், முருகாம்பேடு, கள்ளிக்குப்பம், பானு நகர், வெங்கடேஸ்வரா நகர் விரிவு, திருமுல்லைவாயல், அரிக்கம்பேடு, பொத்தூர் வரை நீண்டுள்ளது.
புழல் ஏரி தண்ணீர் புழல், கீழ்ப்பாக்கம் சுத்திகரிப்பு நிலையங்களில் சுத்திகரிக்கப்படுகிறது. பின்னர், அங்கிருந்து லாரிகள் மற்றும் குழாய்கள் மூலம் சென்னை மாநகர மக்களுக்கு விநியோகம் செய்யப்படுகிறது.
இந்தக் குடிநீரை பொதுமக்கள் சுட வைத்து குடிக்கலாம் என மாநகராட்சி நிர்வாகம் கூறுகிறது. ஆனால், குடிநீர் கொண்டு வரும் புழல் ஏரியில் என்ன நடக்கிறது என்பதை பார்த்தால் நிச்சயம் சுட வைத்துக் குடிக்க கூட யாருக்கும் மனம் வராது.
இது குறித்து சமூக ஆர்வலர்கள் கூறுகையில் புழல் ஏரி செங்குன்றம், அம்பத்தூர், புழல் ஆகிய பகுதிகளின் கழிப்பிடமாக மாறிவிட்டது. இந்தப் பகுதிகளைச் சேர்ந்தவர்கள் ஏரிக்கரையில் இயற்கை உபாதைகளை கழிக்கின்றனர். இவை ஏரி நீரில் கலந்து விடுகிறது. குறிப்பாக, ஏரியில் அதிக அளவு தண்ணீர் இருக்கும் சூழலில் கள்ளிக்குப்பம், முகாம்பேடு, சூரப்பட்டு, அரிக்கம்பேடு, லட்சுமிபுரம் ஆகிய இடங்களில் உள்ள ஏரிப் பகுதியில் நான்கு, இரு சக்கர வாகனங்களை கழுவுவது, மாடுகளை குளிப்பாட்டுவது, துணி துவைப்பது உள்ளிட்ட செயல்கள் நடக்கின்றன.
அம்பத்தூர், திருமுல்லைவாயல் ஆகிய பகுதிகளில் இருந்து வீடு, அடுக்கு மாடிக் குடியிருப்புகளில் இருந்து வெளியேறும் கழிவுநீர், மழை நீர் கால்வாய் மூலம் ஏரியில் கொண்டு விடப்படுகிறது.
புழல் ஏரியைச் சுற்றியுள்ள ஆக்கிரமிப்பு வீடுகளில் இருந்து வெளியேறும் கழிவுநீரும் ஏரியில் கலக்கின்றன. இதனால் ஏரி முழுமையாக மாசடைந்து வருகிறது. இது ஒருபுறம் என்றால், அண்மைக் காலமாக இறைச்சிகத் கழிவுகள், வீடுகளின் குப்பைகள், தென்னை மரக் கழிவுகள், இளநீர் ஓடுகள், கரும்புச் சக்கை கழிவுகள் உள்ளிட்டவையும் புழல் ஏரியில் கொட்டப்படுகின்றன.
இந்த தண்ணீரைக் குடிக்கும் சென்னை மக்கள் பல்வேறு நோய்களுக்கு ஆளாக நேரிடும்.இது குறித்து நீர்வள ஆதாரத் துறை அதிகாரிகளுக்கு புகார் செய்தும், அதிகாரிகள் எவ்வித நடவடிக்கையும் எடுக்காமல் அலட்சியமாக இருப்பதாக குற்றம் சாட்டுகின்றனர்.
நீர்வள ஆதாரத் துறை அதிகாரி கூறுகையில், புழல் ஏரியில் கழிவுநீர் கலப்பதைத் தடுக்க பல்வேறு நடவடிக்கை எடுக்கப்பட்டு வருகிறது. ஆவடி மாநகராட்சி உள்ளிட்ட உள்ளாட்சி அமைப்புகள் வாயிலாக கழிவுநீர் சுத்திகரிப்பு நிலையங்கள் அமைத்து, கழிவுநீரை சுத்திகரித்து ஏரியில் விட நடவடிக்கை எடுத்து வருகிறோம் என்றார்.
