அரசியல் சாசனத்தின் மீது உறுதியேற்று திருமணம் செய்துகொண்ட ஜோடி! - வைரல் திருமணமும், பின்னணியும்!

சத்தீஸ்கர் மாநிலத்தின் ஜாஷ்பூர் மாவட்டத்தில் இருக்கிறது கபு கிராமம். இந்தக் கிராமத்தில் கடந்த 18-ம் தேதி நடந்த திருமணம் தற்போது கவனம் ஈர்த்திருக்கிறது. மணமகள் பிரதிமா லஹ்ரேவுக்கும் மணமகன் எமன் லஹ்ரேவுக்கும் திருமணம் செய்ய பெரியோர்களால் முடிவு செய்யப்பட்டது. பட்டதாரிகளான இருவரும் முற்போக்கு சிந்தனையுடையவர்கள் எனக் கூறப்படுகிறது. அதனால், இருவரும் இணைந்து தங்களின் திருமணம் எப்படி நடக்கவேண்டும் என ஆலோசித்து ஒருமுடிவுக்கு வந்திருக்கின்றனர். அதன்படி, வழக்கமான ஹோம குண்ட மந்திரங்கள், தாலி, குங்கும், அவர்களின் சமூக சடங்குகளான சத் பெராஸ், பேண்ட் பாஜா போன்ற சடங்குகளை தவிர்த்து, இந்திய அரசியல் சாசனத்தின் முன்பு இருவரும் உறுதிமொழி ஏற்றுக் கொண்டு, மிக சாதாரணமாக, எளிமையாக திருமணம் செய்திருக்கின்றனர்.

இப்படி திருமணம் செய்துக்கொண்டதற்குப் பிறகு சமீபத்தில் செய்தியாளர்களை சந்தித்த தம்பதிகள், ``எங்கள் திருமணத் தேதி முடிவு செய்வதற்குமுன்பே சடங்குகளைத் தவித்துதான் திருமணம் செய்ய வேண்டும் என இருவரும் முடிவு செய்தோம். அதை எங்கள் வீட்டாரிடமும் பேசி புரியவைத்தோம். அதன்பிறகே திருமண ஏற்பாடுகள் நடந்தது. சடங்குகளைத் தவிர்க்க முக்கியக் காரணம் செலவுகளைக் குறைப்பதுதான். அண்ணல் அம்பேத்கரின் புகைப்படத்துக்கு முன்பு, அவர் இயற்றிய அரசியல் சாசனத்தின் மீது 'இருவரும் வாழ்நாள் முழுவதும் ஒருவருக்கொருவர் ஆதரவளித்து, அவரவரின் தனிப்பட்ட உரிமைகளை காப்போம்' என உறுதிமொழி ஏற்றுக்கொண்டோம்.

இந்தத் திருமண முறைப்படி தேவையற்ற செலவுகளைக் குறைத்தோம். இந்த நிகழ்வு எங்கள் சமூக மக்களிடம் கவனம் பெற்றிருக்கிறது. பலரும் பாராட்டினார்கள். எங்கள் பெற்றோருக்கும் இந்த முடிவுக்கு மிகவும் மகிழ்ச்சியை வெளிப்படுத்தியிருக்கின்றனர்." என்றார்கள். இது சமூக வலைதளங்களில் பேசுபொருளானபோது, கலவையான விமர்சனங்கள் வந்தன. சிலர், ``திருமணத்தின் உண்மையான, அர்த்தமுள்ள அணுகுமுறை இது... பலரும் இந்த நிகழ்விலிருந்து உத்வேகம் பெறுவார்கள்" என்றனர்.