காங்கிரஸின் இரண்டாம் கட்ட தில்லி நியாய யாத்திரை 16 சட்டப்பேரவைத் தொகுதிகளை உள்ளடக்கிய டிரான்ஸ்-யமுனா பகுதியில் இருந்து வெள்ளிக்கிழமை தொடங்கும் என்று கட்சி நிா்வாகிகள் தெரிவித்தனா்.
செய்தியாளா் கூட்டத்தில் பேசிய தில்லி காங்கிரஸ் தலைவா் தேவேந்தா் யாதவ், ஒரு மாத கால நியாய யாத்திரை டிச.4-ஆம் தேதி முடிவடைவதற்கு முன்பு 70 சட்டப்பேரவைத் தொகுதிகளையும் உள்ளடக்கும் என்றாா்.
4 கட்டங்களாக நடைபெறும் இந்த யாத்திரையின் பல்வேறு பிரிவுகளில் அனைத்து காங்கிரஸ் தலைவா்களும் பங்கேற்பாா்கள் என்றும், இரண்டாவது கட்டம் வடகிழக்கு தில்லியில் உள்ள கோகுல்பூரில் இருந்து வெள்ளிக்கிழமை தொடங்கி 16 சட்டப்பேரவைத் தொகுதிகளை உள்ளடக்கும். யாத்திரையில் பங்கேற்பவா்கள் டிடிஏ மைதானமான தில்ஷாத் காா்டனில் முகாமிடுவாா்கள் என்று அவா் கூறினாா்.
மக்களுடனான நெருக்கமான தொடா்பு காங்கிரஸ் தொண்டா்களுக்கு நம்பிக்கையை அதிகரிக்கும் அனுபவமாக இருந்தது. ஏனெனில் மக்கள் இப்போது காங்கிரஸ் மீண்டும் ஆட்சிக்கு வர விரும்புகிறாா்கள். ஏனெனில் ஒரு காங்கிரஸ் அரசால் மட்டுமே அவா்களின் பிரச்னைகளை திறம்பட தீா்க்க முடியும். திட்டமிட்ட வளா்ச்சியுடன் நகர உள்கட்டமைப்பை மேம்படுத்த முடியும் என்று தேவேந்தா் யாதவ் கூறினாா்.
முதல் கட்ட தில்லி நியாய யாத்திரை நவ. 8-ஆம் தேதி ராஜ்காட்டில் தொடங்கி 15 சட்டப்பேரவைத் தொகுதிகளைக் கடந்து நிறைவடைந்தது.
