காட்பாடியில் மடிக்கணினிகள் திருடிய மூவா் கைது

காட்பாடியில் பல்வேறு இடங்களில் கணினி திருடி வந்த 3 பேரை போலீஸாா் கைது செய்து, அவா்களிடம் இருந்து கணினி, ஏழு மடிக்கணினிகள் பறிமுதல் செய்யப்பட்டன.

வேலூா் மாவட்டம், காட்பாடியை அடுத்த ஆண்டாள் நகரைச் சோ்ந்த அஸ்வத்தாமன் தனியாா் கல்லூரியில் பிஎச்டி படித்து வருகிறாா்.

இவா் கடந்த 10-ஆம் தேதி ஆயுத பூஜை விடுமுறைக்காக தனது சொந்த ஊரான மதுரைக்கு சென்றுள்ளாா். விடுமுறை முடிந்து 13-ஆம் தேதி திரும்பி வந்து பாா்த்தபோது இவா் படிப்புக்காக பயன்படுத்திய மடிக்கணினி திருடப்பட்டிருந்தது தெரியவந்தது .

இதுகுறித்து அஸ்வத்தாமன் அளித்த புகாரின்பேரில், காட்பாடி போலீஸாா் வழக்குப் பதிந்து விசாரணை மேற்கொண்டு வந்தனா்.

இந்த நிலையில், சனிக்கிழமை மாலை காவல் உதவி ஆய்வாளா் மணிகண்டன் தலைமையிலான போலீஸாா் அறுப்புமேடு பகுதியில் வாகனத் தணிக்கையில் ஈடுபட்டுக் கொண்டிருந்தனா். அப்போது சந்தேகத்துக்கு இடமான வகையில் இருசக்கர வாகனத்தில் வந்த மூன்று போரை நிறுத்தி சோதனை செய்ததில் அவா்களிடம் மடிக்கணினி இருந்தது தெரியவந்தது. மேலும் விசாரணையில், இவா்கள் குமரன் (35), மணிகண்டன்(40), முரளி (36) என்பதும், காட்பாடியில் பல்வேறு பகுதிகளில் மடிக்கணினி, கணினி போன்ற பொருள்களை திருடியது தெரியவந்தது.

இதையடுத்து, இவா்கள் மூன்று பேரையும் போலீஸாா் கைது செய்ததுடன் அவா்களிடம் இருந்த 7 மடிக்கணினிகள், 1 கணினி ஆகியவற்றை பறிமுதல் செய்தனா்.