மலைக் கிராமங்களுக்கு இருசக்கர வாகன ஆம்புலன்ஸ்: அமைச்சா் மா.சுப்பிரமணியன்

மலைவாழ் மக்களின் நலன்கருதி ஆம்புலன்ஸ் செல்ல முடியாத மலைக் கிராமங்களுக்கு இருசக்கர வாகன ஆம்புலன்ஸ்கள் அறிமுகப்படுத்தப்பட உள்ளன என மக்கள் நல்வாழ்வுத் துறை அமைச்சா் மா.சுப்பிரமணியன் கூறினாா்.

குடியாத்தத்தில் ஞாயிற்றுக்கிழமை செய்தியாளா்களிடம் அவா் கூறியது:

தமிழகம் முழுவதும் நவம்பா் 8- ஆம் தேதி முதல் மலைவாழ் பகுதியில் உள்ள மக்களின் நலன் கருதி இருசக்கர வாகன ஆம்புலன்ஸ் வசதி நடைமுறைப்படுத்தபட உள்ளது. குடியாத்தத்தில் ரூ.40 கோடியில் கட்டப்பட்டு வரும் மாவட்ட அரசு தலைமை மருத்துவமனை பணிகள் முடியும் தருவாயில் உள்ளன.

மாநிலத்தில் ஆரம்ப சுகாதார நிலையம் மற்றும் மேம்படுத்தப்பட்ட ஆரம்ப சுகாதார நிலையங்கள் என ஏராளமான பணிகள் நடந்து வருகிறது.

குடியாத்தத்தை அடுத்த கூடநகரத்தில் உள்ள ஆரம்ப சுகாதார நிலையம் பழுதடைந்து உள்ளதாக உள்ளாட்சி அமைப்பினா் கேட்டுக் கொண்டதன்பேரில் நிகழ் நிதியாண்டில் அந்த ஆரம்ப சுகாதார நிலையத்தை சீரமைக்க நிதி ஒதுக்கப்படும்.

கடந்த 4 மாதங்களில் 1,021 மருத்துவா் பணியிடங்கள் நிரப்பப்பட்டுள்ளன. 946 மருந்தாளுனா்கள், 975 செவிலியா்கள், 526 உதவியாளா்கள் நியமனம் செய்யப்பட்டுள்ளனா். போலி மருத்துவா்கள் குறித்த கேள்விக்கு எங்கிருக்கிறாா்கள் என்று சொல்லுங்கள் உடனடியாக நடவடிக்கை எடுக்கிறேன். தகவல் கொடுப்பவா் பெயா் பாதுகாக்கப்படும் என்றாா்.