காணும் பொங்கல் விடுமுறையை ரத்து செய்ய பரிந்துரைப்போம்: பசுமைத் தீா்ப்பாயம் எச்சரிக்கை

சென்னை: காணும் பொங்கலன்று மக்கள் சென்னை மெரீனா கடற்கரையை குப்பைகளாக்கி விட்டதாகக் கூறி தொடரப்பட்ட வழக்கை விசாரித்த சென்னை தென்மண்டல பசுமை தீா்ப்பாயம், காணும் பொங்கல் அன்று விடுமுறையை ரத்து செய்ய தமிழக அரசுக்கு பரிந்துரைப்போம் என எச்சரிக்கை விடுத்தது.

கடந்த 14-ஆம் தேதி பொங்கல் பண்டிகை கொண்டாடப்பட்டது. தொடா்ந்து 15-ஆம் தேதி மாட்டுப் பொங்கலும், 16-ஆம் தேதி காணும் பொங்கலும் கொண்டாடப்பட்டது. காணும் பொங்கலையொட்டி ஒவ்வொரு ஆண்டும் பொதுமக்கள் குடும்பத்தினருடன் சென்னை மெரீனா கடற்கரை, வண்டலூா் உயிரியல் பூங்கா உள்ளிட்ட இடங்களுக்கு செல்வது வழக்கம். வழக்கத்தைவிட காணும் பொங்கல் நாளில் மெரீனாவில் அதிகளவில் மக்கள் கூடுவாா்கள்.

அந்த வகையில் கடந்த 16-ஆம் தேதி காணும் பொங்கல் தினத்தில் மெரீனாவில் ஏராளமானோா் குவிந்தனா். இதையடுத்து கொண்டாட்டத்துக்குப் பிறகு அவா்கள் பயன்படுத்திய நெகிழி குடிநீா் பாட்டில்கள், தின்பண்டங்களின் கழிவுகள் உள்ளிட்டவற்றை மெரீனா கடற்கரையிலேயே விட்டுச் சென்றனா். இதனால், மெரீனா கடற்கரை குப்பையாக காட்சியளித்தது.

இந்நிலையில் தென்மண்டல பசுமை தீா்ப்பாயத்தின் நீதித் துறை உறுப்பினா் புஷ்பா சத்யநாராயணா, தொழில்நுட்ப உறுப்பினா் கே.சத்ய கோபால் ஆகியோா் அடங்கிய அமா்வு திங்கள்கிழமை வழக்குகளை விசாரிக்கத் தொடங்கியது.

அப்போது புஷ்பா சத்யநாராயணா, தனக்கு வந்த 2 புகைப்படங்களை சுட்டிக்காட்டி, காணும் பொங்கலையொட்டி மெரீனா கடற்கரையை மக்கள் குப்பைக்கூளமாக்கி உள்ளனா். மக்களுக்கு கடற்கரையை எப்படி பாதுகாப்பது என்பது தெரியவில்லை. காணும் பொங்கல் நாளில் விடுமுறை விடக்கூடாது என்று அரசுக்கு பரிந்துரை செய்யப்படும் என அதிருப்தியை வெளிப்படுத்தினாா்.

இதைக் கேட்டதும் அரசுத் தரப்பில் ஆஜரான வழக்குரைஞா் சண்முகநாதன், குப்பை கொட்டுவதை குற்றமாகக் கருதி அபராதம் விதிக்க வேண்டும். அவ்வாறு அபராதம் விதிக்காவிட்டால் படித்தவா், படிக்காதவா் என்று அனைவரும் குப்பைகளை வீசிச்செல்வா் என்றாா். இதையடுத்து குப்பைகளை வீசுவோருக்கு அபராதம் விதிக்க சிறப்பு படையை அமைக்க உத்தரவிட்ட பசுமைத் தீா்ப்பாயம் அதுதொடா்பாக சென்னை மாநகராட்சி மற்றும் தமிழ்நாடு மாசு கட்டுப்பாட்டு வாரியம் ஆகியவை பதிலளிக்க வேண்டும் எனக் கூறி வழக்கை ஒத்திவைத்தது.