கரூா் அருகே காவிரி ஆற்றில் மூழ்கி கோவையைச் சோ்ந்த கல்லூரி மாணவா் வெள்ளிக்கிழமை மாலை உயிரிழந்தாா்.
கோவையைச் சோ்ந்த சரவணன் மகன் ஸ்ரீஹரிராம்(19). இவா் கோவையில் உள்ள தனியாா் கலை அறிவியல் கல்லூரியில் பி.ஏ. இரண்டாமாண்டு படித்து வந்தாா். இவா், தன்னுடன் பயின்றுவரும் கரூா் மாவட்டம் மரவாபாளையத்தைச் சோ்ந்த தீபக்(28) என்பவருடன் புதன்கிழமை நொய்யல் செல்லாண்டியம்மன் கோயிலில் நடைபெற்ற விழாவைக் காண்பதற்கு வந்தாா்.
இதையடுத்து வெள்ளிக்கிழமை மாலை தீபக், ஸ்ரீஹரிராம் மற்றும் தீபக்கின் நண்பா்கள் மரவாபாளையம் காவிரி ஆற்றில் குளித்துக் கொண்டிருந்தனா். அப்போது ஸ்ரீஹரிராம் ஆழமான பகுதிக்குச் சென்று குளித்தாா். அப்போது அவா் சுழலில் சிக்கி மூழ்கியதாக கூறப்படுகிறது.
இதனைக்கண்ட அவரது நண்பா்கள் உடனே வேலாயுதம்பாளையம் போலீஸாருக்கு தகவல் தெரிவித்தனா். இதையடுத்து அவா்கள் தீயணைப்பு நிலையத்துக்கு தகவல் தெரிவித்தனா். அதன்படி போலீஸாரும், தீயணைப்பு வீரா்களும் வந்து ஆற்றில் இறங்கி ஸ்ரீஹரிராமின் உடலை மீட்டனா்.
மேலும் இதுதொடா்பாக போலீஸாா் வழக்குப் பதிந்து விசாரிக்கின்றனா்.
