கூட்டுறவு சங்கப் பணியாளா்கள் வேலைநிறுத்தம்: இ-சேவை மையம், ரேஷன் கடைகள் மூடப்பட்டதால் மக்கள் பாதிப்பு

பல்வேறு கோரிக்கைகளை வலியுறுத்தி, கூட்டுறவு சங்கப் பணியாளா்கள் திங்கள்கிழமைமுதல் காலவரம்பற்ற போராட்டத்தை தொடங்கினா்.

இதனால் சங்க பரிவா்த்தனை நடைபெறவில்லை. ரேஷன் கடை, இ-சேவை மையம் மூடப்பட்டதால் பொதுமக்கள் பாதிக்கப்பட்டனா்.

தமிழ்நாடு மாநில தொடக்க கூட்டுறவு வங்கி அனைத்து பணியாளா்கள் சங்கம் சாா்பில் கூட்டுறவு கடன் சங்கம், நகர கூட்டுறவு கடன் சங்க விற்பனையாளா்களிடம் அபராத தொகையை இருமடங்கு வசூலிக்கப்படும் அரசு உத்தரவை ரத்து செய்ய வேண்டும். கூட்டுறவு ரேஷன் கடைகளில் கட்டுப்பாடற்ற பொருள்களை அதிகமாக இறக்கி விற்பனை செய்ய குறியீடு நிா்ணயம் செய்வதை கைவிட வேண்டும் என்பன உள்ளிட்ட கோரிக்கைகளை வலியுறுத்தி, கூட்டுறவு சங்கப் பணியாளா்கள் திங்கள்கிழமைமுதல் காலவரம்பற்ற வேலை நிறுத்த போராட்டத்தை தொடங்கினா்.

அதன்படி சாத்தான்குளம் வட்டடத்தில் உள்ள 7 கூட்டுறவு கடன் சங்கத்தில் 23 பணியாளா்கள் வேலைநிறுத்தத்தில் ஈடுபட்டனா்.

இதனால் வாடிக்கையாளா்களின் பணப் பரிவா்த்தனை நிறுத்தப்பட்டது. மேலும், 35 ரேஷன் கடைகள் மூடப்பட்டன. சங்கத்தைச் சோ்ந்த இ-சேவை மையங்களும் செயல்படவில்லை. இதனால் பொதுமக்கள் பாதிக்கப்பட்டனா்.