தூத்துக்குடியில் பலத்த மழை

தூத்துக்குடி புகா் பகுதிகளில் திங்கள்கிழமை பலத்த மழை பெய்தது.

மத்திய கிழக்கு வங்கக் கடல், அதையொட்டிய வடக்கு அந்தமான் கடல் பகுதிகளில் ஞாயிற்றுக்கிழமை உருவான வளிமண்டல மேலடுக்கு சுழற்சி குறைந்த காற்றழுத்தத் தாழ்வுப் பகுதியாக திங்கள்கிழமை உருவாகியது. இதன் காரணமாக, தமிழகத்தில் பல்வேறு இடங்களில் மழை பெய்யக்கூடும் என சென்னை வானிலை ஆய்வு மையம் தெரிவித்திருந்தது.

அதன்படி, தூத்துக்குடி மாநகரப் பகுதியில் திங்கள்கிழமை காலைமுதல் வானம் மேகமூட்டத்துடன் காணப்பட்டது.

தொடா்ந்து, கோரம்பள்ளம், காலாங்கரை, சிப்காட், புதுக்கோட்டை உள்ளிட்ட புகா் பகுதிகளில் நண்பகலில் ஒரு மணி நேரம் பலத்த மழை பெய்தது. இதனால், ஆட்சியா் அலுவலகத்துக்கு மனு அளிக்க வந்தோா் சிரமத்துக்குள்ளாகினா்.

பல இடங்களில் மழைநீா் தேங்கியது. மாநகா் பகுதிகளில் மிதமான மழை பெய்தது.