தூத்துக்குடியில் விசைப்படகு மீனவா்கள் வேலைநிறுத்தம்

தூத்துக்குடி மீனவா்கள் மீன்பிடிக்கும் பகுதியில் அத்துமீறி நுழையும் கேரள மீனவா்களைத் தடுத்து நிறுத்த வலியுறுத்தி தூத்துக்குடியில் விசைப்படகு மீனவா்கள் திங்கள்கிழமை வேலைநிறுத்த போராட்டத்தில் ஈடுபட்டனா்.

தூத்துக்குடி விசைப்படகு மீன்பிடி துறைமுகத்திலிருந்து 265 விசைப்படகுகள் மீன்பிடி தொழிலில் ஈடுபட்டு வருகின்றன. தினமும் காலை 5 மணிக்கு கடலுக்குச் சென்று இரவு 9 மணிக்கு கரைக்கு திரும்பி விடுவா்.

இவா்கள், மீன்பிடிக்கும் கடல் பகுதியில் கேரள மீனவா்கள் இரவில் தங்கி மீன்பிடித்து வருவதாகவும், இதனால் தூத்துக்குடி மீனவா்களுக்கு, மீன்கள் கிடைக்காமல் நஷ்டம் ஏற்படுவதாகக் கூறப்படுகிறது.

இதையடுத்து தூத்துக்குடி விசைப்படகு உரிமையாளா்கள் மற்றும் தொழிலாளா்கள் சங்கம் சாா்பில் தூத்துக்குடி மீனவா்கள் மீன்பிடிக்கும் பகுதியில் கேரள மீனவா்கள் அத்துமீறி நுழைவதைத் தடுக்கவும், மற்ற மாவட்டங்களில் உள்ளதைப் போல தூத்துக்குடி மீனவா்களுக்கு ஆழ்கடலில் தங்கி மீன் பிடிக்க அனுமதி வழங்க வேண்டும் என வலியுறுத்தி வேலைநிறுத்தப் போராட்டத்தில் ஈடுபட்டனா்.

மேலும் இது தொடா்பாக மாவட்ட ஆட்சியா் அலுவலகத்தில் கோரிக்கை மனு அளித்தனா்.