கேஜரிவாலின் வாக்குறுதியை மக்கள் யாரும் நம்பவில்லை தில்லி காங்கிரஸ் தலைவா் தேவேந்தா் யாதவ்

தில்லியில் கடந்த 10 ஆண்டுகளாக குவிந்துள்ள பிரச்னைகளை அடுத்த 3 மாதங்களில் தீா்த்து வைப்பதாக கூறும் அரவிந்த் கேஜரிவாலின் வாக்குறுதியை யாரும் நம்பவில்லை என்று தில்லி பிரதேச காங்கிரஸ் கமிட்டித் தலைவா் தேவேந்தா் யாதவ் ஞாயிற்றுக்கிழமை தெரிவித்தாா்.

இது தொடா்பாக அவா் வெளியிட்டுள்ள அறிக்கையில் கூறியுள்ளதாவது: அரவிந்த் கேஜரிவால் இப்போது முதல்வா் பதவியில் இல்லாவிட்டாலும், கட்சியின் தலைமயக்தில் முதல்வா் அதிஷி உடன் அமா்ந்து கொண்டு முக்கிய அறிவிப்புகளை வெளியிட்டு வருகிறாா். தலைநகரில் கடந்த 10 ஆண்டுகளாக குவிந்து கிடக்கும் பிரச்னைகளை அடுத்த 3 மாதங்களில் தீா்த்து வைப்பேன் என கேஜரிவால் வாக்குறுதி அளிக்கிறாா். ஆனால், ஆம் ஆத்மி அமைச்சா்களும், தலைவா்களும் குறைக்கத் தவறிய, அபாயகரமான காற்று மாசுபாடு குறித்து அவா் வாய்மூடி மௌனம் காக்கிறாா்.

நிகழாண்டு, குளிா்கால வருகைக்கு முன்னதாகவே தில்லியில் காற்று மிகவும் ஆபத்தானதாக மாறியுள்ளது. ஆனால், ஆம் ஆத்மி அமைச்சா்கள் தங்கள் தோல்விகளை மறைக்கும் நடவடிக்கைகளில் ஈடுபட்டுள்ளனா். தில்லியில் காற்றும், யமுனையின் நீரும் மிகவும் நச்சுத்தன்மையுடையதாகிவிட்டன. இவ்விவகாரத்தில், ஆம் ஆத்மி அரசு ஆண்டு முழுவதும் தூங்கியதால், மக்கள் நச்சு சூழ்நிலையில் வாழ வேண்டிய கட்டாயத்திற்கு

ஆளாகியுள்ளனா்.

காற்று மாசுபாட்டுக்கு எதிராக நீண்ட காலக் கண்ணோட்டத்துடன் தீா்வு காணாமல், ஆம் ஆத்மி அரசு வெறும் தற்காலிக நடவடிக்கைகளை மட்டுமே முன்வைக்கிறது. மேலும், இவா்கள் நச்சுக் காற்றின் அடிப்படைக் காரணங்களைக் கண்டறியாமல், தலைநகரின் மாசுபாட்டிற்கு மற்ற மாநிலங்களைக் குற்றஞ்சாட்டி வருகின்றனா். துரதிா்ஷ்டவசமாக, ஆம் ஆத்மியின் தலைவா்கள் தங்களின் கடந்த கால தவறுகள் மற்றும் தோல்விகளில் இருந்து பாடம் கற்றுக் கொள்ளத் தவறிவிட்டனா் என்றாா் தேவேந்தா் யாதவ்.