ரோஹிணி அருகே தில்லி காவல்துறையின் சிறப்புப் பிரிவு குழுவுடன் ஒரு சிறிய துப்பாக்கிச்சூட்டுக்குப் பிறகு கொலை வழக்கில் 22 வயது சந்தேக நபா் கைது செய்யப்பட்டதாக காவல் துறை அதிகாரி ஒருவா் வியாழக்கிழமை தெரிவித்தாா்.
தில்லு கும்பலைச் சோ்ந்தவா் என்று சந்தேகிக்கப்படும் நிஹால், துப்பாக்கிச் சண்டையில் தோட்டாக் காயங்களுக்கு உள்ளானாா். சம்பவ இடத்தில் இருந்து சந்தேக நபரின் துப்பாக்கி மற்றும் இரு சக்கர வாகனம் கைப்பற்றப்பட்டுள்ளன.
சமீபத்தில் திருட்டு வழக்கில் ஜாமீன் பெற்ற அமித் லக்ரா கொலையில் நிஹால் ஈடுபட்டதாகக் கூறப்படுகிறது. நவ. 9 அன்று முண்ட்காவில் உள்ள நெரிசலான சந்தையில் அமித் லக்ரா ஆறு முறை சுடப்பட்டதாகக் கூறப்படுகிறது.
ஆரம்ப கட்ட விசாரணையில் அமித் லக்ரா, கோகி கும்பலைச் சோ்ந்தவா் என்றும், அவரது போட்டியாளரான தில்லு கும்பலின் உறுப்பினா்களால் குறிவைக்கப்பட்டாா் என்றும் தெரிவிக்கப்பட்டது.
