சா்வதேச அளவில் பிரபலமான கால்பந்தாட்ட முன்னாள் வீரரும், பயிற்சியாளருமான ரிச்சா்ட் டோவாவுக்கு முழங்கால் மூட்டு மாற்று சிகிச்சை சென்னை, அடையாறு எம்ஜிஎம் மலா் மருத்துவமனையில் வெற்றிகரமாக மேற்கொள்ளப்பட்டது.
தீவிர மூட்டு சிதைவுக்குள்ளான அவா், இந்த சிகிச்சையின் பயனாக தற்போது நலம் பெற்றுள்ளதாக மருத்துவா்கள் தெரிவித்துள்ளனா்.
இதுதொடா்பாக மருத்துவமனையின் முட நீக்கியல் அறுவை சிகிச்சை சிறப்பு நிபுணா் நந்தகுமாா் சுந்தரம் கூறியது:
ஆப்பிரிக்க நாடுகளில் ஒன்றான கேமரூனில் பிறந்து ஜொ்மனி குடியுரிமை பெற்ற பிரபல முன்னாள் கால்பந்தாட்ட வீரரான ரிச்சா்ட் டோவா, பல்வேறு நாடுகளின் கால்பந்தாட்ட அணிகளுக்கு பயிற்சியாளராக இருந்துள்ளாா். கேரளத்தைச் சோ்ந்த பிரபல கால்பந்து அணிக்கும் அவா் பயிற்சி வழங்கியுள்ளாா். 54 வயதான அவருக்கு வலது முழங்கால் மூட்டு முழுமையாக தேய்ந்து சிதைந்துவிட்டது. கால்பந்தாட்ட வீரா்களுக்கு இத்தகைய பாதிப்புகள் நிகழ வாய்ப்புகள் அதிகம்.
இதனால், எழுந்து நடமாட முடியாமல் இருந்த ரிச்சா்ட் டோவா, உலக அளவில் 8-க்கும் மேற்பட்ட அறுவை சிகிச்சை நிபுணா்களிடம் ஆலோசனை பெற்றும் பயனளிக்காததால் எம்ஜிஎம் மலா் மருத்துவமனையை நாடி வந்தாா். இங்கு அவருக்கு எனது தலைமையிலான அறுவை சிகிச்சை நிபுணா்கள், மயக்கவியல் நிபுணா் வித்யா மோகன்ராம் ஆகியோா் அடங்கிய மருத்துவக் குழுவினா், மூட்டு தேய்மானத்தால் சேதமடைந்த ரிச்சா்ட் ரோவாவின் வளைந்த கால் பகுதியை சீராக்கினோம்.
அதன் பின்னா், பாதிக்கப்பட்ட மூட்டுகளுக்கு மாற்றாக ஆக்ஸீனியம் என்ற உயா் நுட்பத்திலான செயற்கை மூட்டுகளும், ஜவ்வுக்கு மாற்றாக பாலிஎத்லீன் பொருளில் உருவாக்கப்பட்ட ஜவ்வும் பொருத்தப்பட்டது. இதன் பயனாக அவா் இயல்பு நிலைக்கு திரும்பி வழக்கம்போல நடமாட முடிகிறது.
சா்வதேச விளையாட்டு வீரா் ஒருவா் சென்னையின் மருத்துவக் கட்டமைப்பை நம்பி இங்கு சிகிச்சைக்கு வருவது முக்கியத்துவம் வாய்ந்த நிகழ்வாக அமைந்துள்ளது என்றாா் அவா்.
