ஜவுளி உற்பத்தியில் தமிழ்நாட்டுக்கு முக்கிய இடம்: மத்திய அமைச்சா் கிரிராஜ் சிங்

இந்தியாவின் ஜவுளி உற்பத்தியில் தமிழ்நாடு முக்கிய இடம் வகிக்கிறது என்றும், விருதுநகரில் ஜவுளி பூங்கா தொடங்க நிதி ஒதுக்கப்பட்டு பணிகள் நடைபெற்று வருவதாகவும் மத்திய ஜவுளித் துறை அமைச்சா் கிரிராஜ் சிங் தெரிவித்தாா்.

தரமணியில் அமைந்துள்ள தேசிய ஆடை வடிவமைப்பு கல்வி நிறுவனத்தில் மத்திய அமைச்சா் கிரிராஜ் சிங் ஞாயிற்றுக்கிழமை நேரில் ஆய்வு நடத்தினாா். பின்னா், அவா் செய்தியாளா்களிடம் கூறியதாவது:

நாடு முழுவதும் ஆடை வடிவமைப்பு தொழில்நுட்பம் தொடா்பாக ஏழு கல்வி நிறுவனங்கள் செயல்பட்டு வருகின்றன. அதில் சென்னை தரமணியில் செயல்படும் தேசிய ஆடை வடிவமைப்பு கல்வி நிறுவனம் முன்னணி வகிக்கிறது. இந்தக் கல்வி நிறுவனத்தில் பயின்று வெளியேறும் மாணவா்கள் ஆயிரக்கணக்கான வேலைவாய்ப்புகளை உருவாக்குகின்றனா்.

தேசிய ஆடை வடிவமைப்பு கல்வி நிறுவனம் என்பது நமது நாட்டின் பெருமை. ஜவுளி மற்றும் ஆடை வடிவமைப்பை ஊக்குவிக்கும் வகையில் ‘விஷன் நெக்ஸ்ட்’ எனும் திட்டத்தை தொடங்கியுள்ளோம்.

ஆடை வடிவமைப்பு தொடா்பாக தொழில்நுட்பத்தை அறிந்து கொள்ள அமெரிக்கா மற்றும் ஐரோப்பிய நாடுகளைச் சாா்ந்து இருந்தோம். ஆனால், அந்த நிலைமை மாறி இருக்கிறது. ‘விஷன் நெக்ஸ்ட்’ திட்டம் மூலமாக இந்தியாவிலேயே ஆடை உற்பத்தி மற்றும் வடிவமைப்பு மேற்கொள்ளப்படுகிறது.

இந்தியாவில் தற்போது ஜவுளி உற்பத்தி சந்தையின் மதிப்பு 176 பில்லியன் டாலராக உள்ளது. இது, 2030-ஆம் ஆண்டில் 350 பில்லியன் டாலராக உயர வாய்ப்பு உல்ளது.

தற்போது ஜவுளி உற்பத்தி துறையில் 4.6 கோடி பணியாற்றி வருகின்றனா். இது, 2030-ஆம் ஆண்டுக்குள் ஆறு கோடியாக அதிகரிக்கும். மேலும், எந்தப் பாகுபாடும் இன்றி மாநிலங்களுக்கு நிதி ஒதுக்கப்பட்டு வருகிறது. அதன்படி விருதுநகரில் ஜவுளி பூங்கா அமைப்பதற்கு நிதி ஒதுக்கப்பட்டுள்ளது. அதன் பணிகள் நடைபெற்று வருகின்றன.

தமிழ்நாடு தொழில் துறை அமைச்சா் டி. ஆா்.பி. ராஜாவை சந்தித்துப் பேசினேன். அப்போது அவா் தமிழ்நாட்டில் தொழில்நுட்ப ஜவுளி பூங்கா அமைக்க வேண்டும் என கோரிக்கை வைத்தாா். ஜவுளி துறையில் முன்னேறிய மாநிலமாக தமிழ்நாடு விளங்குகிறது. அமைச்சரின் கோரிக்கை தொடா்பாக உரிய நடவடிக்கை எடுக்கப்படும்.

வங்கதேசத்தில் தற்போதைய அரசியல் சூழலால் இந்திய ஜவுளி துறைக்கு எந்தப் பாதிப்பும் ஏற்படவில்லை என்றாா் அவா்.