ஜாதிவாரி கணக்கெடுப்பு நடத்துவது தொடா்பாக, சட்டத் துறை அமைச்சருடன் அதிமுக உறுப்பினா் தளவாய் சுந்தரம் வாக்குவாதத்தில் ஈடுபட்டாா்.
சட்டப் பேரவையில் சட்டம், நீதித் துறை மானியக் கோரிக்கை மீது வெள்ளிக்கிழமை நடந்த விவாதத்தில், அதிமுக உறுப்பினா் தளவாய் சுந்தரம் பேசுகையில்,
தமிழ்நாட்டில் ஜாதிவாரி கணக்கெடுப்பு நடத்துவதில் எந்தவிதத் தடையும் இல்லை என்பதால் அதனை நடத்த வேண்டும் என்றாா்.
இதற்குப் பதிலளித்த அமைச்சா் எஸ்.ரகுபதி, ஜாதிவாரி கணக்கெடுப்பை நாங்கள் எதிா்க்கவில்லை, மத்திய பாஜக அரசுதான் அதனை எடுக்க முடியுமே தவிர நாங்கள் எடுக்க முடியாது என்று பதிலளித்தாா்.
தொடா்ந்து பேசிய அதிமுக உறுப்பினா் தளவாய் சுந்தரம், 69 சதவீத இட ஒதுக்கீடு தொடா்பான வழக்கில் பாதகமான தீா்ப்பு வராமல் இருக்க ஜாதிவாரி கணக்கெடுப்பு அவசியமாகிறது எனக் கூறி, ஜாதிவாரி கணக்கெடுப்பை நடத்துவதில் உங்களுக்கு என்ன கஷ்டம்? என்று கேள்வி எழுப்பினாா்.
அப்போது, குறுக்கிட்ட அமைச்சா் ரகுபதி, பல ஆண்டு காலம் ஆட்சியில் இருந்தீா்களே, நீங்கள் ஏன் ஜாதிவாரி கணக்கெடுப்பை நடத்தவில்லை? எனக் கேள்வி எழுப்பினாா். இந்தக் கேள்விக்குப் பதில் கூறிய தளவாய் சுந்தரம், தமிழகத்தில் எடப்பாடி பழனிசாமி முதல்வராக இருந்த போதுதான் ஓய்வுபெற்ற நீதிபதி குலசேகரன் தலைமையிலான ஆணையம் அமைக்கப்பட்டது எனப் பதிலளித்தாா்.
இதையடுத்துப் பேசிய அமைச்சா் எம்.ஆா்.கே.பன்னீா்செல்வம், தோ்தலுக்காக மட்டும் அந்த ஆணையம் அமைக்கப்பட்டதே தவிர, உண்மையான மனசாட்சியுடன் ஆணையம் அமைக்கப்படவில்லை எனக் குறிப்பிட்டாா்.
இதைத் தொடா்ந்து பேசிய உறுப்பினா் தளவாய் சுந்தரம், திமுக ஆட்சிக்கு வந்ததையடுத்து, ஆணையத்தின் கால அவகாசத்தை ஏன் நீட்டிக்கவில்லை? என்று கேள்வி எழுப்பினாா்.
இதற்கிடையே, பாமக உறுப்பினா் அருள், ஜாதிவாரி கணக்கெடுப்பை மாநில அரசு நடத்த வேண்டும் எனக் கூறினாா். அதற்குப் பதில் அளித்த அமைச்சா் ரகுபதி, ஜாதிவாரி கணக்கெடுப்பு நடத்த வேண்டும் என்பதுதான் மாநில அரசின் நிலைப்பாடு. 2026 மக்கள் தொகை கணக்கெடுப்புடன் ஜாதிவாரி கணக்கெடுப்பை மத்திய அரசு எடுக்க வேண்டும். அதற்கு கூட்டணியில் இருக்கும் பாமக மத்திய அரசை வலியுறுத்த வேண்டும் எனக் கூறினாா்.
