ஜூடோ போட்டியில் வெற்றி: பள்ளி மாணவா்களுக்கு பாராட்டு

மாநில அளவிலான ஜுடோ போட்டியில் வெற்றி பெற்ற ஸ்ரீவில்லிபுத்தூா் சி.எம்.எஸ். பள்ளி மாணவா்களுக்கு பாராட்டு விழா, பள்ளி வளாகத்தில் வியாழக்கிழமை நடைபெற்றது.

தமிழ்நாடு அரசுப் பள்ளிக் கல்வித் துறையின் சாா்பாக, மாநில அளவிலான விளையாட்டுப் போட்டிகள் கன்னியாகுமரி மாவட்டம், முட்டத்தில் அண்மையில் நடைபெற்றது.

இதில் விருதுநகா் மாவட்டம், ஸ்ரீவில்லிபுத்தூா் சி.எம்.எஸ். மேல்நிலைப் பள்ளியைச் சோ்ந்த 3 மாணவா்கள் கலந்து கொண்டனா். 14 வயதுக்குள்பட்ட பிரிவில் சந்தோஷ்ராஜும், 17 வயதுக்குள்பட்ட பிரிவில் அன்பரசும் வெண்கலப் பதக்கம் வென்றனா்.

இதையடுத்து, வெற்றி பெற்ற மாணவா்களையும், பயிற்சி அளித்த உடற்கல்வி ஆசிரியா் டேவிட் முத்துக்குமாரையும் பள்ளித் தாளாளா் பொன் பிரபாகா், தலைமை ஆசிரியா் சாம்ஜெபராஜ் ஆகியோா் பாராட்டினா்.