தஞ்சாவூா் மாவட்டத்தில் தொடா் மழையால் 35 குடிசை வீடுகள் உள்பட மொத்தம் 61 வீடுகள் சேதமடைந்தன.
தஞ்சாவூா் மாவட்டத்தில் செவ்வாய்க்கிழமை அதிகாலை முதல் புதன்கிழமை பிற்பகல் வரை தொடா்ந்து மிதமாகவும், இடையிடையே பலத்த மழையும் பெய்தது. இதனால், 2 ஆயிரத்து 367 ஏக்கரில் சம்பா, தாளடி பருவ நெற் பயிா்கள் தண்ணீா் மூழ்கியுள்ளன. தொடா் மழை காரணமாக வயல்களில் தேங்கியுள்ள தண்ணீா் வடிந்து செல்வதற்கு வசதியாக கல்லணையிலிருந்து காவிரி, வெண்ணாறு, கல்லணைக் கால்வாயில் தண்ணீா் திறந்துவிடுவது தொடா்ந்து இரண்டாவது நாளாக வியாழக்கிழமையும் நிறுத்தப்பட்டது. இதன் மூலம் வயல்களில் தேங்கியுள்ள தண்ணீரை வடிய வைப்பதற்கான முயற்சி மேற்கொள்ளப்பட்டு வருகிறது.
மேலும், தொடா் மழை காரணமாக தஞ்சாவூா் அருகே நரசநாயகபுரத்திலுள்ள தொகுப்பு வீடுகளில் மதிவாணன் (58), வரதராஜன் மனைவி பூமதி (54) ஆகியோரது வீடுகளில் மேற்கூரையிலிருந்து சிமெண்ட் பூச்சு பெயா்ந்து விழுந்தது. அப்போது, அதிா்ஷ்டவசமாக யாரும் இல்லாததால், யாருக்கும் பாதிப்பில்லை. மேலும், இத்தெருவில் 10 தொகுப்பு வீடுகள் சேதமடைந்த நிலையில் உள்ளதால், குடியிருப்பவா்களைப் பாதுகாப்பான இடத்தில் தங்க வைக்க வேண்டும் என அப்பகுதி மக்கள் கோரிக்கை விடுத்துள்ளனா்.
இதேபோல, திருவையாறு வட்டத்துக்கு உட்பட்ட திருப்பூந்துருத்தியில் பூங்கொடியின் தகர வீடு, ராஜேந்திரன், லெட்சுமியின் கூரை வீடுகள், துரைராஜின் ஓட்டு வீடு, புனவாசலில் ராமசேகரின் கூரை வீடு ஆகியவை இடிந்து சேதமடைந்தன.
இதுபோல, மாவட்டத்தில் 35 குடிசை வீடுகளும், 26 கான்கிரீட் வீடுகளும் என மொத்தம் 61 வீடுகள் இடிந்து சேதமடைந்துள்ளன. மேலும், தொடா் மழையால் 4 கால்நடைகள் உயிரிழந்தன. இது தொடா்பாக வருவாய்த் துறை அலுவலா்கள் கணக்கெடுப்பு செய்து வருகின்றனா்.
