தமிழகத்தில் நவ.13 வரை கனமழை நீடிக்கும்

தமிழகத்தில் வெள்ளிக்கிழமை (நவ.8) முதல் நவ.13 வரை கனமழை பெய்ய வாய்ப்புள்ளது என சென்னை வானிலை ஆய்வு மையம் தெரிவித்துள்ளது.

அதேசமயம், வங்கக்கடலில் அடுத்த இரு வாரங்களுக்கு புயல் உருவாக வாய்ப்பில்லை என இந்திய வானிலை மையம் தெரிவித்துள்ளது.

தென்மேற்கு வங்கக்கடல் மற்றும் மன்னாா் வளைகுடா பகுதிகளின் மேல் வளிமண்டல கீழடுக்கு சுழற்சி நிலவுகிறது. இந்த அமைப்பு வடதுருவ குளிா் காற்றைத்தான் அதிகளவில் இழுக்கிறது. இதனால், சென்னை உள்ளிட்ட வடகடலோர மாவட்டங்களில் காலை நேரங்களில் பனிப்பொழிவுக்கு இடையே குளிா்ந்த காற்றுடன் மிதமான மழைபெய்ய வாய்ப்புள்ளது.

மேலும், வெள்ளிக்கிழமை (நவ.8) முதல் நவ.13 வரை தமிழகத்தில் அநேக இடங்களிலும், புதுச்சேரி மற்றும் காரைக்கால் பகுதிகளிலும், இடி, மின்னலுடன் கூடிய மழை  பெய்ய வாய்ப்புள்ளது.

கனமழை எச்சரிக்கை: இதில், நவ.8-ஆம் தேதி கன்னியாகுமரி, திருநெல்வேலி, தென்காசி, விருதுநகா், மதுரை, சிவகங்கை, தூத்துக்குடி, ராமநாதபுரம், புதுக்கோட்டை, தஞ்சாவூா், திருவாரூா், நாகப்பட்டினம், மயிலாடுதுறை ஆகிய மாவட்டங்களிலும், நவ.9,10 ஆகிய தேதிகளில் கடலூா், மயிலாடுதுறை, நாகப்பட்டினம், தஞ்சாவூா், திருவாரூா், புதுக்கோட்டை ஆகிய மாவட்டங்களிலும் கனமழை பெய்யவாய்ப்புள்ளது.

அதேபோல், நவ.11,13-ஆகிய தேதிகளில் சென்னை, செங்கல்பட்டு, காஞ்சிபுரம், திருவள்ளூா், ராமநாதபுரம், புதுக்கோட்டை, தஞ்சாவூா், திருவாரூா், நாகப்பட்டினம், மயிலாடுதுறை, கடலூா், விழுப்புரம் ஆகிய மாவட்டங்களிலும், புதுச்சேரி மற்றும் காரைக்கால் பகுதிகளிலும் ஓரிரு இடங்களில் கனமழை பெய்யவாய்ப்புள்ளது.

நவ.12-இல் கன்னியாகுமரி, திருநெல்வேலி, தூத்துக்குடி, தென்காசி, விருதுநகா், மதுரை, சிவகங்கை, ராமநாதபுரம், புதுக்கோட்டை, தஞ்சாவூா், திருவாரூா், நாகப்பட்டினம், கடலூா், மயிலாடுதுறை ஆகிய மாவட்டங்களில் கனமழை பெய்யவாய்ப்புள்ளது.

மழை அளவு: தமிழகத்தில் வியாழக்கிழமை காலை வரை அதிகபட்சமாக திருவள்ளூா் மாவட்டம் பொன்னேரியில் 90 மிமீ மழை பதிவானது. மேலும், காரைக்கால் - 70 மி.மீ. மணலி (சென்னை) - 60 மி.மீ. மற்றும் பல்வேறு மாவட்டங்களில் குறிப்பிடத்தக்க அளவு மழை பதிவாகியுள்ளது என சென்னை வானிலை மையம் தெரிவித்துள்ளது.

புயல் உருவாக வாய்ப்பில்லை: இதற்கிடையே நவம்பா் மாதம் 2 -ஆவது வாரத்தில் வங்கக்கடலில் காற்றழுத்தத் தாழ்வு பகுதி (புயல்சின்னம்) உருவாக வாய்ப்புள்ளதாக அறிவிக்கப்பட்டிருந்த நிலையில், தற்போது புயல்சின்னம் உருவாக வாய்ப்பில்லை என இந்திய வானிலை மையம் தெரிவித்துள்ளது. அதாவது 2 வார காலத்துக்கு வங்கக்கடலில் புயல் உருவாகாது எனக் கூறியுள்ளது.

அதாவது, நிலநடுக்கோட்டையொட்டிய பசிபிக் பெருங்கடல் மற்றும் இந்திய பெருங்கடல் பகுதியில் கடல் வெப்பநிலை தகவமைப்பு சாா்ந்த நடுநிலை எல்நினோ நிலவுவதால் காற்று சாதகமின்மை உள்ளது. மேலும் வங்கக்கடலில் காற்றழுத்தத் தாழ்வு மண்டலத்தை உருவாக்கும் சாதக சூழல் எனப்படும் காற்றுச்சுழற்சி வலுவடைந்து தமிழகக் கரையை நோக்கி நகர வாய்ப்பில்லை. இதனால், வங்கக்கடலில் காற்றழுத்த தாழ்வு நிலை போன்ற புயல்சின்னங்கள் அடுத்த 2 வாரங்களுக்கு உருவாக வாய்ப்பில்லை என்று வானிலை மையம் தெரிவித்துள்ளது.