திருக்குறள்: "அந்த காலத்திலேயே சமூக சீர்திருத்தம் செய்தவர் திருவள்ளுவர்’’ - விஐடி வேந்தர் விசுவநாதன்

தமிழியக்கம் சார்பில், வேலூர் வி.ஐ.டி பல்கலைக்கழகத்தில் திருவள்ளுவர் விழா நடைபெற்றது. இந்த நிகழ்ச்சிக்கு வி.ஐ.டி வேந்தரும் தமிழியக்கத்தின் தலைவருமான கோ.விசுவநாதன் தலைமை வகித்து, மாநில அளவில் நடத்தப்பட்ட கவிதை, பேச்சு, கட்டுரைப் போட்டிகளில் வெற்றி பெற்ற மாணவர்களுக்குப் பரிசு வழங்கினார்.

இதைத்தொடர்ந்து, வேந்தர் விசுவநாதன் பேசுகையில், "ஆண்டுதோறும் திருவள்ளுவர் விழா நடத்துகிறோம். தமிழுக்கு நாம் சொந்தக்காரர்கள் என்பது பெருமையானது. அதைவிட, திருவள்ளுவர், திருக்குறள் நமக்குச் சொந்தமானது என்பது உயர்வானது. ஏனெனில், எல்லா நாட்டினரும், எல்லா மதத்தினரும் ஏற்றுக்கொள்ளக்கூடிய ஒரு நூலாக வள்ளுவர் நமக்குத் திருக்குறளைத் தந்துள்ளார். அவருக்கு உருவம் இல்லையா எனப் பலபேர், பலவிதமாக அவர் உருவத்தை வரைந்து கொண்டிருந்தனர்.

1960-ல் பாவேந்தர் பாரதிதாசன் முயற்சி எடுத்து, ஒரு படத்தை வரைய வேணுகோபால் சர்மாவிடம் கொடுத்தார். உதவியாக இருந்தது ராம.தமிழ்ச்செல்வன். அவர், என் சொந்த கிராமத்துக்கு அருகிலுள்ள உலகாசியைச் சேர்ந்தவர். அந்த ஓவியத்தைத் தமிழறிஞர்கள் மற்றும் மறைந்த முதலமைச்சர் அண்ணாதுரை உள்ளிட்ட எல்லோருமே ஏற்றுக்கொண்டனர். மத்திய, மாநில அரசுகளும் ஏற்றுக்கொண்டன. அதுதான் இன்றைய திருவள்ளுவர் படமாக இருக்கிறது. அதை மாற்ற வேண்டும் என நினைப்பது சரியல்ல என்று தான் எனக்குத் தோன்றுகிறது.

சுவடியாக இருந்த திருக்குறள், முதன்முதலாக 1812-லும், அதன் பிறகு 1860-லும்தான் அச்சிடப்பட்டது. திருக்குறளில் 14 ஆயிரம் சொற்கள் இருக்கின்றன. அதில் 50 சொற்கள் வடமொழி எனக் கூறப்படுகிறது. கடவுளைப் பற்றி எழுதாத நூல் இதுதான். கடவுள் பெயரை இதில் எங்கும் குறிப்பிடவில்லை. 2013-ம் ஆண்டு வரை திருக்குறளுக்கு 497 உரைகள் எழுதப்பட்டுள்ளன.

இதுவரை 170 மொழிகளில் திருக்குறள் மொழியாக்கம் செய்யப்பட்டுள்ளது. திருக்குறள் முதன்முதலாக மலையாளத்திலும், அதன் பிறகு லத்தீனிலும் மொழி பெயர்க்கப்பட்டது. ஆங்கிலத்தில் 1886-ல் ஜி.யு.போப் மொழி பெயர்த்தார். 1941-ல் திருக்குறள் மாநாட்டைத் திருக்குறள் முனுசாமி நடத்தினார்.

சுதந்திரத்துக்குப் பிறகு 1949-ல் தந்தை பெரியார், திருக்குறள் மாநாட்டை நடத்தினார். அந்த மாநாட்டில், `தமிழனுக்கு மதம் தேவையென்றால், அது திருக்குறள் மதமாக இருக்க வேண்டும்’ என்று பேசினார் பெரியார். 1976-ல் வள்ளுவர் கோட்டத்தையும், கன்னியாகுமரியில் திருவள்ளுவருக்கு 133 அடியில் கற்சிலையையும் கலைஞர் கருணாநிதி உருவாக்கினார்.

திருக்குறளைப் பற்றி மாணவர்கள் தெரிந்து கொள்ள வேண்டும். ராமலிங்க அடிகளார் திருக்குறளை ஒரு இயக்கமாக மாற்றினார். திருக்குறளுக்கு மறைந்த முன்னாள் நிதியமைச்சர் நெடுஞ்செழியன் எழுதிய உரையை நீங்கள் படிக்க வேண்டும். தலைவர்கள் அத்தனை பேரும் திருக்குறளைப் போற்றினார்கள்; பாராட்டினார்கள். எல்லோரிடமும் திருக்குறள் சென்று சேர தமிழியக்கம் பாடுபடும். திருக்குறளை எல்லோரும் படிக்க வேண்டும். தமிழன் நல்லவனாகவும், வல்லவனாகவும் இருக்க வேண்டும். இப்போது, தமிழகத்தில் நல்ல ஆட்சி நடைபெற்றுக்கொண்டிருக்கிறது. அந்த காலத்திலேயே சமூகத்தைச் சீர்திருத்தம் செய்தவர் திருவள்ளுவர். மொழியால் தமிழனாகவும், இனத்தால் திராவிடனாகவும், நாட்டால் இந்தியர்களாகவும் இருக்க வேண்டும். நம்மை நாம் மறந்துவிடக் கூடாது’’ என்றார் வேந்தர் கோ.விசுவநாதன்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://tinyurl.com/2b963ppb

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...https://tinyurl.com/2b963ppb