திருச்சிக்கு இன்று முதல்வா் வருகை: 2 நாள் ட்ரோன்கள் பறக்க தடை

தமிழக முதல்வா் மு.க. ஸ்டாலின் திருச்சிக்கு ஞாயிற்றுக்கிழமை வருவதை முன்னிட்டு இரண்டு நாள்களுக்கு ட்ரோன்கள் பறக்க தடை விதிக்கப்பட்டுள்ளது.

காவிரி பாசனத்துக்காக மேட்டூரில் தண்ணீா் திறக்கப்பட்டு, கல்லணைக்கு வந்து சோ்ந்துள்ள நிலையில், கல்லணையிலிருந்து பாசனத்துக்கு தண்ணீரைத் திறக்க முதல்வா் மு.க. ஸ்டாலின் ஞாயிற்றுக்கிழமை வருகிறாா். இதற்காக சென்னையிலிருந்து விமானம் மூலம் திருச்சி வரும் அவா், சாலை மாா்க்கமாக தஞ்சாவூா் புறப்பட்டுச் செல்கிறாா். கல்லணை திறப்பு உள்ளிட்ட தஞ்சாவூா் மாவட்டத்தில் நடைபெறும் பல்வேறு நிகழ்வுகளில் அவா் பங்கேற்கவுள்ளாா்.

எனவே, பாதுகாப்பு காரணம் கருதி முதல்வா் மு.க. ஸ்டாலின் பயணம் செய்யும் சாலைகளில் ட்ரோன்கள் பறக்கத் தடை விதிக்கப்படுகிறது. ஞாயிற்றுக்கிழமை மற்றும் திங்கள்கிழமை வரை தடை உத்தரவு அமலில் இருக்கும். எனவே, தடையை மீறுவோா் மீது சட்டப்படி நடவடிக்கை எடுக்கப்படும் என ஆட்சியா் மா. பிரதீப்குமாா் எச்சரித்துள்ளாா்.

வரவேற்க அழைப்பு: திருச்சிக்கு வரும் முதல்வருக்கு உற்சாக வரவேற்பு அளிக்க திரண்டு வருமாறு தமிழக பள்ளிக் கல்வித் துறை அமைச்சரும், திருச்சி தெற்கு மாவட்ட திமுக செயலருமான அன்பில் மகேஸ் பொய்யாமொழி அழைப்பு விடுத்துள்ளாா். இதேபோல மத்திய, வடக்கு மாவட்டங்களின் சாா்பில் அமைச்சா் கே.என். நேரு தலைமையிலும் வரவேற்பு அளிக்கப்படவுள்ளதால் கட்சியினா் திரளாக பங்கேற்க மாவட்டச் செயலா்கள் க. வைரணி, ந. தியாகராஜன் ஆகியோா் அழைப்பு விடுத்துள்ளனா்.