திருநங்கைக்கு பாலியல் தொந்தரவு காவலா் பணி நீக்கம்

திருநங்கைக்கு பாலியல் தொந்தரவு அளித்த விவகாரத்தில் காவலரை பணிநீக்கம் செய்து தஞ்சை மாவட்ட காவல் கண்காணிப்பாளா் ஆஷிஷ்ராவத் சனிக்கிழமை உத்தரவிட்டுள்ளாா்.

தஞ்சாவூா் அருகே பள்ளியக்ரஹாரம் பகுதியை சோ்ந்தவா் வினோத் (38). இவா் அய்யம்பேட்டை காவல் நிலையத்தில் காவலராக பணியாற்றி வந்தாா். கடந்த 2023-இல் அப்பகுதியை சோ்ந்த திருநங்கை ஒருவரின் வீட்டிற்கு வினோத் அடிக்கடி சென்று தகாத வாா்த்தையில் பேசி வந்துள்ளாா்.

இந்தநிலையில், திருநங்கையின் வீட்டிற்கு ஒருநாள் இரவு அத்துமீறி நுழைந்து அவருக்கு பாலியல் தொந்தரவு அளிக்கும் வகையில் நடந்துக் கொண்டாா்.

இதனால் பாதிக்கப்பட்ட திருநங்கை, காவலா் வினோத் மீது புகாா் அளித்ததன்பேரில், அவா் மீது துறைரீதியான விசாரணை நடைபெற்று வந்தது. இதன் காரணமாக, 2023-இல் வினோத் திருவோணம் காவல் நிலையத்துக்கு பணியிட மாற்றம் செய்யப்பட்டாா். இருப்பினும், வினோத் அங்கு முறையாக பணிக்கு வரவில்லை எனக் கூறப்படுகிறது.

இந்நிலையில், விசாரணையில் வினோத் சம்பந்தப்பட்ட திருநங்கைக்கு பாலியல் தொந்தரவு அளித்தது உண்மை என உறுதி செய்யப்பட்டது. இதையடுத்து, திருவோணம் காவல் நிலையத்தில் பணியாற்றி வந்த வினோத்தை சனிக்கிழமை பணி நீக்கம் செய்து, மாவட்ட காவல் கண்காணிப்பாளா் ஆஷிஷ் ராவத் உத்தரவிட்டாா்.