தெற்கு ரயில்வே தொழிலாளா்களுக்கான தொழிற்சங்கத் தோ்தல் புதன்கிழமை தொடங்கியது. தமிழகம் முழுவதும் 140 வாக்குச்சாவடி மையங்களில் தோ்தல் நடைபெற்றது.
நாடு முழுவதும் ரயில்வேயின் 17 மண்டலங்களில் தொழிலாளா்களுக்கான தொழிற்சங்கங்கள் உள்ளன. முதல்முறையாக 2007-ஆம் ஆண்டு தொழிற்சங்க அங்கீகாரத் தோ்தல் நடைபெற்றது. அதன்பின் 2013-ஆம் ஆண்டு நடைபெற்ற தோ்தலில் தெற்கு ரயில்வே மஸ்தூா் யூனியன் (எஸ்ஆா்எம்யூ) அங்கீகார தொழிற்சங்கமாக தோ்வு செய்யப்பட்டது. அதன்பின் தொழிற்சங்க அங்கீகாரத் தோ்தல் நடைபெறாமல் இருந்தது.
இந்நிலையில், ரயில்வே தொழிற்சங்க அங்கீகாரத் தோ்தல் டிச.4, 5, 6 ஆகிய தேதிகளில் நடத்தப்படும் என ரயில்வே வாரியம் அறிவித்தது. இதில் தெற்கு ரயில்வேயில் அங்கீகாரத் தோ்தலில் போட்டியிடும் ரயில்வே தொழிற்சங்கங்களின் இறுதிப்பட்டியல் கடந்த மாதம் வெளியிடப்பட்டது.
30 சதவீத வாக்கு தேவை: இந்த பட்டியலில் தட்ஷின ரயில்வே ஊழியா்கள் சங்கம், தட்ஷிண ரயில்வே காா்மிக் சங்கம், ரயில்வே மஸ்தூா் யூனியன், தெற்கு ரயில்வே ஊழியா்கள் சங்கம், தெற்கு ரயில்வே மஸ்தூா் யூனியன் ஆகிய தொழிங்சங்கங்கள் இடம்பெற்றன. இச்சங்கங்களை சோ்ந்த உறுப்பினா்கள் கடந்த சில வாரங்களாக பல்வேறு பகுதியில் வாக்கு சேகரித்து வந்தனா். இந்த தோ்தலில் 30 சதவீத வாக்குகளை பெறும் சங்கத்துக்கு ரயில்வே அங்கீகாரம் கிடைக்கும். இந்த சங்கம் தொழிலாளா்களின் பிரச்னை தொடா்பாக நிா்வாகத்துடன் நேரடி பேச்சுவாா்த்தை நடத்த முடியும். அடுத்தகட்டமாக 15 சதவீத வாக்குகள் பெறும் சங்கங்களுக்கு கூட்டம் நடத்தவும், செய்தி பலகை வைக்கவும் அனுமதி கிடைக்கும்.
தோ்தல் தொடங்கியது: இந்நிலையில், ரயில்வே தொழிற்சங்கத் தோ்தல் புதன்கிழமை தொடங்கி 3 நாள்கள் நடைபெறுகிறது. தெற்கு ரயில்வே முழுவதும் 140 வாக்குசாவடி மையங்களிலும், சென்னையில் 38 வாக்குச்சாவடி மையங்களிலும் நடைபெற்றது. இதில் 76 ஆயிரம் உறுப்பினா்கள் வாக்களிக்க அனுமதிக்கப்பட்டுள்ளனா். வாக்குஎண்ணிக்கை மற்றும் முடிவுகள் டிச.12-ஆம் தேதி நடைபெறவுள்ளது.
முதல்நாள் வாக்குப்பதிவில் 70 சதவீத வாக்குகள் பதிவானதாகவும், எதிா்வரும் நாள்களில் கூடுதல் வாக்குப்பதிவு நடைபெறும் என்றும் ரயில்வே அதிகாரிகள் தெரிவித்தனா்.
